DILI 09 janeiru 2025 (TATOLI)—Autoridade Nasionál Komunikasaun (ANC, sigla portugés) sei foku ba prioridade rua iha tinan-2025.
Prezidente ANC, Flávio Cardoso Neves, hateten, órgaun ne’e hala’o knaar atu implementa Governu nia polítika iha setór telekomunikasaun nian, ne’ebé iha ona planu klaru atu dada filafali mai iha Autoridade ne’e hodi haree saida mak bele halo tuir planu.
“Tinan 2025 ne’e, ita foku ba prioridade hanesan kabu submarinu no Governu eletróniku ne’ebé hakarak implementa,” Prezidente ANC informa ba Agência Tatoli, iha ninia knaar fatin, Mercado-lama, kinta ne’e.
Notísia relevante : ANC arrekada reseita millaun $3,1 durante tinan 2024
Aleinde ne’e, Autoridade ne’ebé nu’udar órgaun reguladór halo hela esforsu másimu hodi prepara kondisaun ba prosesu instalasaun kabu submarinu.
ANC mós daudaun ne’e halo esforsu hodi haree ajénsia ne’ebé mak bele responsabiliza ba implementasaun Governu eletróniku.
“Ita hanesan órgaun reguladór, ita-nia serbisu importante mak regula setór telekomunikasaun ne’e ho di’ak nune’e teknolojia sira ne’ebé iha bele fó benefísiu di’ak ba ita-nia dezenvolvimentu nasionál,” nia akresenta.
Tuir Prezidente, lei sibernétika nu’udar asuntu boot ne’ebé envolve instituisaun balun ba ninia elaborasaun.
“Ita ko’alia kona-ba sibernétika, kada setór diferente, ezemplu ba ANC foku ba operadór telekomunikaun de’it oinsá atu garante fó buat sira ne’ebé sai preokupasaun ba ita-nia ka Governu ne’e sira proteja, ba Polísia, Banku no seluk tan lei sibernétika ne’e la hanesan,” nia esplika.
Governu Sentrál haree hela atu kria padraun nasionál ida sai legál ida ba ajénsia hotu.
ANC aloka orsamentu millaun $1,3 ba tinan ne’e, ne’ebé montante ne’e hanesan mós tinan kotuk, atu reforsa dezenvolvimentu knaar ANC inklui planu prioridade sira.
Jornalista : Arminda Fonseca
Editora : Julia Chatarina