DILI, 09 janeiru 2025 (TATOLI)–Benefisiáriu na’in 80-resin ba programa bolsa parsiál gradua ona no aprezenta-an ona ba Fundu Dezenvolvimentu Kapitál Umanu (FDCH, sigla portugés).
Diretór Ezekutivu FDCH, Júlio Aparício, hateten, knaar FDCH mak hodi fasilita no apoiu fundu ba estudante hodi kontinua estudu iha nível Ensinu Superiór.
“Finalista sira-ne’e gradua ona no entrega ba Governu mak iha kompeténsia no responsabildade hodi utiliza sira ka oinsá maibé graduadu mós bele kria rasik kampu traballu ba an rasik. Husi totál bolseiru, bolsa interiór (bolsa hakbiit) ne’e na’in 80-resin mak gradua no automátikamente redús ona,” Diretór Ezekutivu FDCH, informa ba Agência Tatoli, iha ninia knaar fatin, Colmera, kinta ne’e.
Institutu Superiór Cristal gradua ona finalista 10 nune’e ohin na’in-hitu ne’ebé hala’o ona estudu iha área enfermajen aprenzenta-an iha FDCH.
“Husi Universidade Dili (UNDIL) hamutuk 15, husi DIT 20, Universidade Orientál Timor-Lorosa’e (UNITAL) área saúde mós hamutuk 12, inklui balun husi universidade no institutu seluk,” nia akresenta.
Notísia relevante : Bolseiru hamutuk 2.520 bolsa parsiál asina ona kontratu
FDCH sei kontinua programa ne’e, ne’ebé daudaun ne’e halo hela kontajen ba estudante sira ne’ebé hetan bolsa parsiál atu bolu atensaun hodi halo esforsu estudu no labele baruk apreende.
“Ita-boot sira prepara-an tanba Governu fó ona fundu ba ita-nia estudu hodi fasilita, entaun aproveita didi’ak oportunidade ida-ne’e hodi hasa’e ita-boot sira-nia matenek iha área oin-oin,” nia tenik.
Programa bolsa parsiál bazeia ba diploma ministeriál númeru 78/2021 10 novembru relasiona ho rejime atribuisaun bolsa estudu ba frekuénsia iha territóriu nasionál no regulamentasaun pedidu individuál apoiu finanseiru ba estudu iha ensinu superiór akreditadu nasionál.
Programa ne’ebé oferese husi FDCH ne’e ba apoiu kustu propina estudante nian to’o konklui estudu no sei la kobre selu kustu sira seluk hanesan kustu moris, alojamentu no kustu didátiku.
Enkuantu, Bolsa hakbiit define kada bolseiru sei hetan kustu vida $120 kada fulan hodi kobre sira-nia alojamentu, transporte, alimentasaun no ekipamentu didátiku. Ba propina nian Governu sei transfere direita ba konta bankária universidade ne’ebé benefisiáriu sira hala’o estudu.
Jornalista : Osória Marques
Editora : Julia Chatarina