DILI, 09 janeiru 2025 (TATOLI)–Bolseiru timoroan hamutuk 193 liuhusi programa Fundu Dezenvolvimentu Kapitál Umanu (FDCH, sigla portugés) no serbisu hamutuk ho liña ministeriál, hala’o ona estudu iha rai-li’ur iha área oin-oin, durante tinan 2024.
“Ita-nia bolseiru bá iha Brazíl hamutuk 17, Portugal 14, Malázia 31, Asia Pasific University (APU) sia, Petronas 22, Tailándia 10, Cabo Verde 10 (mestradu haat no lisensiatura neen), na’in-16 hala’o estudu ih Poltekes Jakarta iha área anastezia, Cuba neen iha área arte no kultura. Ida-ne’e Sekretaria Estadu Arte Kultura (SEAK) nia planu,” Diretór Ezekutivu FDCH, Júlio Aparício, informa iha ninia knaar fatin, Colmera, kinta ne’e.
FDCH mós serbisu hamutuk ho Ministériu Saúde (MS) hodi haruka médiku espesialista 18 bá Cuba, iha área direitu ba reforma justisa iha bolseiru 49 maibé 46 mak bá hasai lisensiatura iha Portugal no na’in-tolu seluk ba tuir formasaun iha Portugal.
“Númeru bolseiru sira-ne’e seidauk bele responde, ba ha’u menus liu tanba ne’e mak iha tinan 2025 ami planu hasai tan uitoan mak liuhusi estudante iha Ensinu Sekundáriu Jerál no Ensinu Tékniku Vokasionál ba mellór klasifikasaun sira,” nia akresenta.
Notísia relevante : FDCH tinan oin prioriza bolsa estudu ba espesialista iha área oin-oin
FDCH sei halo selesaun tanba sei hala’o estudu iha área prioridade hanesan saúde no enjeñaria. Tinan ne’e haree liu bá espesialista nune’e atribui vaga 24 ba MS hodi bele haruka sira-nia emar ba espesialista médiku, enfermajen, parteira, farmasia no seluk tan.
“Ami entrega vaga 24 ba Ministériu Saúde no sira mak halo rekrutamentu. Aleinde ne’e ami mós fó ba F-FDTL no PNTL, maibé ida-ne’e ami sei halo enkontru ho Konsellu Administrasaun ho liña ministeriál iha loron 21 janeiru, depois diskute no oinsá fahe orsamentu ba asuntu ne’e. Nune’e bele implementa iha tinan ne’e,” nia tenik.
FDCH fó ona bolsa estudu ba ema rihun 11-resin hahú husi tinan 2011 to’o 2023, ne’ebé maioria daudaun serbisu hotu ona no sai funsionáriu iha liña ministeriál sira. Iha rihun 5-resin mak sei ativa hela no restu hotu ona.
Enkuantu, husi tinan 2011 to’o 2024, bolseiru hamutuk 400-resin la ramata tuir data ne’ebé iha. Sira bá eskola iha Portugal no ikus mai muda fali ba país balun iha Europa hodi hala’o serbisu no balun tanba isin-rua.
“Ida-ne’e ami sei haree no buka tuir hodi multa, maibé ita sei haree didi’ak lai, tanba se ita ba ezije maibé sura osan laiha oinsá, ne’ebé ita sei haree didi’ak ida-ne’e no ita sei hadi’a sistema, no hadi’a diploma ministeriál para kesi metin ema sira ne’ebé ita fó bolsa, nune’e labele mosu tan fallansu sira ne’ebé la’o. Se lae akontese tiha ema hotu fase liman, fó sala ba FDCH, estudante no seluk tan, maibé haluha katak ita hotu kontribui ba fallansu ne’e. Ne’ebé ba oin ita sei hare ida-ne’e no hadi’a,” nia katak.
Jornalista : Osória Marques
Editora : Julia Chatarina