VIQUEQUE, 09 janeiru 2025 (TATOLI)- Diretór Servisu Diresaun Transporte no Telekomunikasaun (DNTT) munisípiu Viqueque, Saul Henrique, relata, husi fulan Janeiru to’o Dezembru 2024, konsege rekolla reseita $96,007.50 ba kofre Estadu.
“Reseita hamutuk $96,007.50, liu ona tarjetu tanba iha tinan 2024, ami-nia tarjetu mak rihun $80, ida-ne’e hatudu sinál ida di’ak”, Diretór Saul hateten ba Agência TATOLI, iha ninia kna’ar fatin, Beloi, ohin.
Iha tinan ne’e, DNTT sei mellora liután servisu atendimentu ba kliente sira hodi rekolla reseita husi dokumentu transporte karta kondusaun no xapa matríkula.
“Ami iha ona planu integradu atu halo programa sosializa ba motorista sira kompriende trata dokumentu transporte no karta kondusaun sira. Tanba dokumentu balun ami trata tiha rai de’it iha edifísiu DNTT, entaun ita presiza kria sosialisaun ba ita-nia motorista sira”, nia afirma.
DNTT Viqueque sei koordena ho tranzitu hodi sensibliza ba komunidade sira hodi trata dokumentu transporte no karta kondusaun. Nune’e labele prejudika ba viajen iha territóriu laran.
“Nune’e ami tau ona ba planu atu fó kapasitasaun ba funsionáriu liuliu formasaun hanesan karta kondusaun, inspesaun atu ita-nia funsionáriu sira bele iha koñesementu”, nia afirma.
Kona-ba atendimentu tinan 2024, DNTT Viqueque halo inspesaun transporte motorizada no karreta hamutuk 4.283, lisensa hamutuk 261, karta kondusaun 696, rejistu 1.008.
Tuir taxa kada trimestre DNTT munisípiu Viqueque rekolla hahú trimestre dahuluk $25,982.50, trimestre daruak $16,935, trimestre datoluk $30,030.50 no trimestre da-haat $23,059.50.
Daudaun ne’e, funisionáriu servisu DNTT Viqueque na’in-10 kada loron fó atendimentu ba kliente sira.
Jornalista : Vitorino Lopes da Costa
Editór : Florencio Miranda Ximenes