DILI, 09 janeiru 2025 (TATOLI)—Fundu Dezenvolvimentu Kapitál Umanu (FDCH, sigla portugés) konsege ezekuta Orsamentu Jerál Estadu (OJE) 2024 ho persentajen 96,67%.
“Ida-ne’e persentajen provizória tanba ami halo pagamentu to’o loron 15 janeiru tinan ne’e, tanba balun ami kompromisu tiha ona no pagamentu reál seidauk hotu, ida-ne’e sei prosesu hela,” Diretór Ezekutivu FDCH, Júlio Aparício informa ba Agência Tatoli, iha ninia knar fatin, Colmera, kinta ne’e.
Notísia relevante : FDCH tinan oin prioriza bolsa estudu ba espesialista iha área oin-oin
Husi totál orsamentu $16.400.668 ne’ebé aloka na FDCH, seidauk ezekuta osan hamutuk $700 (3,53%).
Osan sira-ne’e ezekuta ba programa no atividade liga ba formasaun, bolsa estudu, bolsa parsiál, inklui ba administrasaun no funsionáriu sira-nia saláriu.
FDCH nia proposta orsamentu ba tinan 2025 hamutuk $18.973.544, ne’ebé mak sei finansia ba atividade 51, iha programa prinsipál haat mak hanesan formasaun profisionál ho nia orsamentu $1.223.780 ne’ebé sei finansia atividade tolu, formasaun téknika ho nia orsamentu $2.051.682 sei finansia atividade 16, bolsa estudu ho nia orsamentu $13.956.821 sei finansia ba atividade 30 no funsionamentu no dezenvolvimentu institusionál ho nia orsamentu $1.741.261 sei finansia ba atividade rua.
“Orsamentu tinan oin ami halo transferénsia públika millaun $13 maibé millaun $9 ne’e ami hodi utiliza ba sira-neʼebé ezistente, katak estudante tantu parsiál no pur méritu, inklui iha rai-li’ur no rai-laran,” nia tenik.
Jornalista : Osória Marques
Editora : Julia Chatarina