iklan

EKONOMIA, HEADLINE

Governu lansa fatuk dahuluk ba konstrusaun subestasaun Comoro

Governu lansa fatuk dahuluk ba konstrusaun subestasaun Comoro

Primeiru-Ministru, Kay Rala Xanana Gusmão no Embaixadora Repúblika Xina iha Timor-Leste, Wang Wenli, hatuur fatuk dahuluk ba konstrusaun subestasaun Comoro, iha Comoro, kinta (09/01/2025). Imajen/Mídia GPM

DILI, 09 janeiru 2025 (TATOLI)–Governu liuhusi Eletridade de Timor-Leste, Empreza Públika, (EDTL, E.P), kinta ne’e, lansa fatuk dahuluk ba konstrusaun subestasaun Comoro no rede transmisaun 150kV iha Fomentu II, suku Comoro, postu administrativu Dom Aleixo, munisípiu Dili hodi hadi’a kualidade fornesimentu enerjia ba komunidade Dili.

Objetivu harii subestasaun mak atu ajuda halo balansu distribuisaun enerjia elétrika iha Dili, liu-liu iha parte oeste, ne’ebé instalasaun elétrika ne’e sai hanesan alternativa hodi asegura fornesimentu enerjia bainhira halo manutensaun ka akontese avaria iha subestasaun Camea.

Serimónia lansamentu direta husi Primeiru-Ministru (PM), Kay Rala Xanana Gusmão, Embaixadora Repúblika Xina iha Timor-Leste, Wang Wenli, Ministru Obra Públika, Samuel Marçál no Vise-Prezidente Enjeñaria Internasionál TBEA, Zhang Mangyang inklui konvidadu sira seluk.

Primeiru-Ministru, Kay Rala Xanana Gusmão, konsidera instalasaun elétrika ne’e bele haforsa liután sistema tekonolojia, atividade komersiál, industriál ba kada uma no instituisaun Estadu sira, eskola, liu-liu oferese enerjia elétrika ne’ebé ho kualidade bá ospitál sira.

“Presiza garante enerjia elétrika ne’ebé oferese, bainhira iha problema tenke responde kedan. Ida ne’e mak ohin ita halo iha ne’e. Se iha nesesidade atu halo ida iha Aileu, nune’e ida Hera ne’e ladún forsa karik bele simu husi Betano nian,” Xefe Governu hateten iha ámbitu serimónia lansamentu konstrusaun, iha Comoro.

Notísia relevante : Timor GAP, E.P sei fornese gazoel litru millaun 33 ba sentrál elétrika Betano

Ministru Obra Públika, Samuel Marçál, hateten, konstrusaun subestasaun Comoro ho rede transmisaun 150kV ida-ne’e importante tebes tanba hetan apoiu husi Governu Xina hodi mellora no garantia kualidade fornesimentu enerjia eletrisidade ba populasaun Dili.

“Hanoin katak subestasaun Camea ne’e distribui de’it enerjia eletrisidade ba munisípiu Aileu no Ermera,” Ministru Obra Públika hateten iha ámbitu serimónia lansamentu obra, Comoro.

Instalasaun elétrika ne’e implementa husi empreza xineza TBEA International Engineering ho  durasaun tempu fulan-15, ho kustu millaun $25, kompostu husi konstrusaun subestasaun ho kustu millaun $18 no liña transmisaun millaun $7.

Iha biban hanesan Embaixadora Repúblika Xina iha Timor-Leste, Wang Wenli, hateten, Governu Xina komprometidu atu kontinua fó apoiu ba povu no Governu Timor-Leste tanba projetu referidu la’ós de’it atu fornese eletrisidade ba povu Timor-Leste, maibé mós atu promove industrializasaun ba dezenvolvimentu ekonómiku Timor-Leste.

Nune’e mós, Vise-Prezidente Enjeñaria Internasionál TBEA, Zhang Mangyang, dehan, projetu ne’e sei hatán ba nesesidade povu Timor nian iha asesu ba eletrisidade ho kualidade no kontribui ba prosperidade ekonómika.

“Ami komprometidu atu apoia dezenvolvimentu infraestrutura eletrisidade nian iha Timor-Leste,” nia akresenta.

Projetu konstrusaun no instalasaun subestasaun kompostu husi transformadór unidade tolu ho kapasidade 120 MVA, ho nia ekipamentu sira inklui sistema Supervisory Control and Data Acquisition (SCADA).

Aleinde ne’e, rede transmisaun 150 kV ho distánsia kuaze kilómetru lima ho double ciscuit.

Implementasaun projetu ne’e bazeia ba estudu viabilidade ne’ebé halo ona durante tinan-ida resin husi empreza konsultóe PT. Amythas JV ho PT. Hexa Integra Electrica no Caiulu Unip, Lda.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!