VIQUEQUE, 10 janeiru 2025 (TATOLI)- Institutu Gestaun Equipamentu no Apoiu Dezenvolvimentu Infraestrutura, Institutu Publiku (IGEADI, I.P), destakadu Munisipiu Viqueque, lori ona ekipamentu pezadu atu halo normalizasaun ba ponte Sumaku ne’ebé lokáliza iha área suku Uma Tolu, postu administrativu Lacluta, munisípiu Viqueque.
IGEADI,I.P halo normalizasaun tanba ponte referidu hetan estragu kauza husi udan bo’ot iha tinan 2024, nune’e bele fasilita komunidade halo movimentu.
“Ami-nia administradór Lacluta mak ba hasoru direta Prezidente Autoridade Munisípiu (PAM), hafoin PAM fó autorizasaun ba Obra Públika Viqueque, koordena ho IGEADI, I.P hodi halo normaliza ba ponte Sumaku ne’ebé kotu. IGEADI, I.P)destaka sira-nia ekipamentu kedas iha loron 27 Dezembru 2024 hodi halo normalizasaun hanesan aterru rai hodi komunidade bele halo movimentu”, Xefe Suku Dilór, Jacinto Ximenes, hateten ba Agência TATOLI, iha postu Viqueque Vila, ohin.
Ho normalizasaun ne’e, Autoridade lokál dehan daudaun ema ho transporte halo movimentu la’o di’ak fali ona.
“Maibé, normalizasaun ne’e ami autoridade sira haree sei la dura tanba tempu udan, mota-tun sei sobu fali hodi difikulta ita-nia populasaun sira iha postu Lacluta”, nia afirma.
Tanba ne’e, Nia husu Governu liuhusi Ministériu Obra Públika ba oin tau ona ba planu hodi konstrui ponte Sumaku hodi bele fasilita ema no transporte iha tempu udan.
Responde kestaun ne’e, Diretór Servisu Obra Públika munisípiu Viqueque, Casildo Soares Gomes, haktuir, ponte Sumaku daudaun ne’e IGEADI, I.P konsege halo normalizasaun emerjénsia hodi fasilta populasaun sira husi postu Lacltua.
“Ponte Sumaku ita rezolve ho emerjénsia atu fasilita ita-nia populasaun sira. Tanba durante ne’e ita-nia komunidade sira preokupa tebes ba ponte Sumaku. Ba konstrusaun ita aprezenta ona ba Ministériu ne’ebé ita hein rezultadu ba konstrusaun ba ponte referida”, nia hato’o.
Lembra fali katak ponte referidu kotu dahuluk iha tinan 2019, tuir mai iha tinan 2021 no 2023 inklui iha loron 06 Abríl 2024.
Tuir dadús, postu Lacluta kompostu husi suku haat hanesan Uma-tolu, Dilór, Ahic no Laline, ho totál abitatente 8.123 husi uma-kain 1.907.
Jornalista : Vitorino Lopes da Costa
Editór : Florencio Miranda Ximenes
