iklan

EKONOMIA, BAUKAU, HEADLINE, MUNISÍPIU

Postu Quelicai Antigu prioriza infraestrutura bázika

Postu Quelicai Antigu prioriza infraestrutura bázika

Administradór postu administrativu Quelicai Antiga, Francisco Matias Gusmão. Imajen TATOLI/Natalino Belo.

BAUCAU, 10 janeiru 2025 (TATOLI) – Autoridade Postu Administrativu Quelicai antiga sei fó prioridade ba infraestrutura bazika ne’ebé konsideradu inportante ba povu.

Administradór Postu Administrativu Quelicai Antiga, Francisco Matias Gusmão, esplika, nu’udar postu foun presiza indetifika rekursu hotu liuliu fo prioridade ba infraestrutura bazika sira hanesan bee-mos, eletrisidade no estrada ne’ebé ligadu ba nesesidade povu iha postu referida.

“Iha Hau-nia mandatu sei fo prioridade ba infraestrutura bazika liuliu estrada, bee-moos no kompleta eletrisidade, ” Administradór Postu Administrativu Quelicai Antiga hateten iha Vila antiga, sesta ne’e.

Francisco Gusmão, argumenta, planu hirak-ne’e sei realiza liuhusi reuniaun asembleia postu administrativu nune’e bele hetan alokasaun orsamentu iha tinan-2026.

Autoridade postu identifika ona área sira -ne’ebé komunidade balun seidauk asesu eletrisidade hanesan aldeia Uadaboru, suku Guruça, Nalidole, suku Namanei no Uaitame.

Autoridade lokál sei solusiona hanesan kanaliza bee-moos hosi kada bee-matan ne’ebé konsideradu seidauk sufisiente ba komunidade sira iha suku sira-ne’ebé hola parte iha postu Quelicai Antiga liuhusi Programa Nasionál Dezenvolvimentu Suku (PNDS).

“Liga ba estrada ita ajenda ona atu foku liuhusi reuniaun asembleia postu administrativu,” Francisco Gusmão akresenta.

Postu referida estabelese liuhosi alterasaun datoluk dekretu-lei númeru 11/2029, loron-07 outubru kona-ba Divizaun Administrativa Territóriu ne’ebé postu Quelicai fahé ba postu tolu hanesan postu Quelicai, postu Matebian no postu Quelicai Antigu.

Postu Quelicai Antiga iha área 80km² hamutuk suku lima kompostu Afaça, Namanei, Guruça, Abafala no Uaitame ho totál populasaun 12.754.

Jornalista  : Natalino Belo

Editór        : Evaristo Soares Martins

iklan
iklan

Leave a Reply

iklan
error: Content is protected !!