2025-INFPM aloka ona millaun $13 ba sosa medikamentu
DILI, 13 janeiru 2025 (TATOLI) — Diretór Aprovizionamentu Institutu Nasionál Produtu Médiku no Farmaseútiku (INFPM), Mariano da Silva Marques, dehan INFPM prepara, iha tinan 2025, fundu liu millaun $13 liuhosi Orsamentu Jerál Estadu, hodi sosa medikamentu.
“Iha tinan 2025, ita iha ona rejistu, planu kompras tinan ida-ne’e nian, ita aloka fundu ba sosa ai-moruk mesak porvolta $13.582.000,00,”, Diretór Aprovizionamentu INFPM Mariano da Silva hateten ba jornalista Tatoli iha nia kna’ar fatin Kampu Alor, segunda ne’e.
Silva dehan, totál orsamentu ba kompras item ai-moruk sira ne’e, INFPM sei loke konkursu hamutuk 32, hodi kompras ai-moruk konsumevel.
“Tuir regulamentu ne’ebé iha, aprovizionamentu ho valór rihun $100 ba leten sei loke ba tenderizasaun, karik menus husi rihun $100 bele halo RFQ (Request For Quotation), depois mak sei haree tuir orsamentu ne’ebé iha, entaun ami sei loke aprovizionamentu ne’e, karik loke ba tenderizasaun jerál, depois empreza lokál no internasionál sira bele halo tuir”, nia dehan.
Nia hateten katak INFPM seidauk halo aprovizionamentu, tanba presiza iha aprovasaun husi Ministra Saúde mak foin bele implementa.
“Se iha fulan-Janeiru, ita hahú prosesa aprovizionamentu, entaun iha fulan-Fevereiru iha item ai-moruk balun sei to’o iha TL, no ita hein katak prosesu aprovizionamentu ne’e bele halo lalais”, nia informa.
Ba planu kompras atuál, konsumivel no ai-moruk sira ne’ebé importante liu sei sosa uluk.
Ministériu Saúde ho nia totál Orsamentu Jerál Estadu 2025 ho valór $73,931,148 no aloka ba INFPM ho totál 16,431,180,00.
Jornalista : Feliciddade Ximenes
Editór : Zezito Silva
