DILI, 13 janeiru 2025 (TATOLI)—Deputada husi bankada CNRT iha Parlamentu Nasionál (PN), Maria Gorumali Barreto, kontra profisionál saúde halo passagem de modelo (fashion show) iha Hospitál Nasionál Guido Valadares (HNGV).
“Ha’u mós haree observasaun kona-ba situasaun iha Hospitál Nasionál Guido Valedares (HNGV) liuliu isue ida-ne’ebe mosu halo fashion show. Ha’u la konkorda no krítika tebes ba desizaun ida-ne’ebé mak husi HNGV, liuliu dirijente sira iha ospitál ne’eba, ne’ebé foti desizaun halo fashion show iha ne’eba,” Deputada CNRT, Maria Gorumali Barreto, levanta liuhusi reuniaun plenária PN, segunda ne’e.
Tuir Prezidente Komisaun F trata asuntu Saúde, Igualidade Jéneru no Inkluzaun Sosiál iha PN, ne’e katak, HNGV ne’e fatin ne’ebé la’ós halo fashion show maibé fatin ida-ne’ebé konsentra atu haree ba moras sira-ne’ebé mak iha ospitál.
“Maibé, parte ida sira-nia fashion show ne’e haree liu ba iha farda (uniforme) ba iha profisionál saúde sira, tuir ida-idak ninia profisaun ne’ebé iha. Ne’e rekomendasaun ida husi komisaun F sujere médiku iha ninia farda ketak, parteira, enfermeira ho nune’e públiku ka pasiente no família se de’it mak vizita ospitál bele hatene ida-ne’e,” nia dehan.
Maibé, nia dehan, mosu desizaun ida pesoál saúde halo fali atividade fashion show iha Hospitál Nasionál Guido Valadares ne’e, komisaun F la konkorda ho situasaun ida-ne’e.
Entretantu, Xefe Komisaun Organizadora Kompetisaun Uniforme HNGV, Armenia da C. Pereira, hateten atividade fashion show ne’e hanesan sensibilizasaun liuhusi kompetisaun ba uniforme ka farad foun ba profisionál saúde iha Hospitál Nasionál Guido Valadares.
“Objetivu husi atividade ida-ne’e atu semsibiliza uniforme/farda foun kada diresaun ba públiku hodi bele identifika pesoál saúde sira-nia servisu entre Médiku Espesialista, Médiku Jerál, Enfermeiru, Parteira, Tékniku Aliadu, Servisu Administrassaun, Seguransa no ekipa Limpeza,” Xefe Komisaun Organizadora ne’e hateten, sesta (10 janeiru 2024) ne’e.
Nia hatutan, kompetisaun ne’e atu hatudu oinsá pesoal saúde sira-nia perfoma ida loloos bainhira mai hala’o lma’ar no fó atendimentu ba pasiente sira tuir Kodigu konduta no Etika HNGV nian, tanba durante ne’e pesoál saude sira mós hatais farda la tuir sira-nia profisaun hodi atende pasiente sira
“Ita hare durante ne’e HNGV difikuldade iha farad, halo ita-nia pesoál saúde sira hatais farda la tuir ida-ida nia profisaun, tamba ida-ne’e atividade ida ohin atu hatudu uniforme foun ida públiku hodi identifika pesoál saúde sira-nia identidade loloos,” nia dehan.
Alende ne’e, Diretora Ezekutiva no Prezidente Konsellu Diretiva HNGV, Cecilia Barros Mendonça, hateten atividade atu hatudu ba publiku nomós ba pesoál saúde sira relasiona ho uniforme foun ne’ebé eziste iha HNGV.
Uniforme ida-ne’e hanesan identidade husi pesoál servisu saúde ida-idak nian tanba pesoál servisu Hospitál Nasional Guido Valadares hamutuk 1000-resin ho profisaun oioin mak la hanesan.
Ho nune’e, nia husu ba pesoál servisu sira atu utiliza farda tuir ida-idak nia profisaun bainhira halo atendimentu ba pasiente sira iha HNGV.
Jornalista : Nelson de Sousa
Editór : Cancio Ximenes
