DILI, 14 Janeiru 2025 (TATOLI) – Reitór Institutu Superiór Kristál (ISC, sigla portugés), Sebastião Perreira, afirma katak sei haruka tan dosente hamutuk 30-resin, iha tinan ida-ne’e, ba kontinua estudu iha Portugal, Brazil, Indonézia no Amérika, ho objetivu atu mellora liután kapasidade no esperiénsia sira.
“Tinan ida-ne’e, planu atu haruka tan dosente 30-resin, ne’e ba estuda iha área espesialidade iha saúde, enfermajen, parteira no mós fisoterapia. Hirak ne’e, balun ba iha Portugál, Brazil, Indonézia no Amérika”, Reitór ISC hateten iha knaar fatin, Balide, tersa ne’e.
Reitór dehan, ISC kontinua haruka dosente ba estuda iha rai li’ur tanba hakarak rekursu tenke kualifikadu. Dosente sira bainhira fila mai bele hanorin estudante sira iha universidade ho kualidade, hodi atinje polítika universidade nian katak dosente sira tenke maioria iha doutoramentu.
“Ita-nia hakarak dosente iha universidade ne’e maiória tenke doutoramentu, entaun ita tenke haruka sira ba kontinua estuda iha li’ur, nune’e fila mai hanorin estudante sira ho edukasaun ne’ebé mak kualidade”, nia dehan.
Tuir dadus katak dosente sira ne’ebé, atualmente, kontinua hela estudu iha rai li’ur hamutuk 48, balun iha Portugál, Brazil, Indonézia no balun iha Amérika.
IOB sei haruka mós dosente 10 ba estuda iha estranjeiru
Reitór Institute Of Business (IOB), Pedro Barreto Ximenes, hateten dosente na’in-10, tinan ida-ne’e, sei ba kontinua estudu iha Portugal ho Indonézia.
“Dadaun ita-nia dosente ne’ebé iha rai li’ur ne’e besik 40 no sira estuda hela, tinan ida-ne’e ita planeia hela atu haruka 10 ba tan estuda iha rai li’ur, maibé ita hein sira ida iha rai li’ur fila mak ita foin haruka fali tan ba”, dehan nia.
Reitór dehan, dosente na’in-10 balun sei ba kontinua estudu iha nível mestradu no doutoramentu iha área ekonómia negósiu, turizmu, ospitalidade no Informasaun Komunikasaun no Teknolojia.
“Dosente barak mak ita haruka ba ona, kontinua estuda iha mestradu no doutoramentu no sira fila mai bele ajuda ona no na’in-10 ne’e kada fakuldade na’in-rua no ba nível mestradu no doutoramentu iha área ekonómia negósiu, turizmu, ospitalidade no Informasaun Komunikasaun no Teknolojia”, nia konklui.
jornalista : Osória Marques
Editór : Zezito Silva