DILI, 14 Janeiru 2025 (TATOLI) – Institute Of Business (IOB) no Instituto Superiór Cristal (ISC) simu estudante foun ba tinan letivu 2025 hamutuk 2.550. Husi totál estudante hirak ne’e, IOB simu 900 no ISC hamutuk 1650.
“IOB tinan ida-ne’e simu estudante 900. Rejistrasaun hahú ona iha fulan-Janeiru ne’e kedas, daudaun ne’e ami halo hela ezame admisaun ba etapa dahuluk nian, etapa dahuluk estudante iha 350 ne’ebé rejistadu no etapa ne’e kontinua rejistu hela no inisíu fevereiru ne’e hotu ona”, Reitór IOB, Pedro Barreto Ximenes, ba Tatoli iha knaar fatin, Fomento, tersa ne’e.
Reitór dehan, rejistrasaun kuandu konklui mak sei kontinua kedas ba orientasaun no iha inísiu fulan-Marsu prosessu aprendizajen la’o kedas.
“Rejistrasaun iha fevereiru hotu ona, bainhira rejistrasaun hotu ita kontinua kedas ba orientasaun no prosessu aprendizajen hahú iha inísiu marsu”, reitór IOB dehan.
Nia esplika, iha prosesu orientasaun ne’e la uza modelu sira ne’ebé hamoe estudante ka hakilar estudante sira-ne’e, maibé, sei fó orientasaun ba estudante ho introdusaun regra sira iha universidade inklui fó koñesimentu matéria sira.
“Orientasaun ba estudante foun sira la uza ona aprosimasaun modelu militár, modelu hamoe estudante, modelu hakilar estudante sira-ne’e, laiha ona, ita priénse atividade barak ho workshop, ho introdusaun regra kampus, introdusaun ba matéria, dosente, regra akadémiku, depois sira mós halo konsulta ho sira-nia xefe departamentu sira, nune’e sira bele prepara ba anu letivu foun, ida-ne’e mak ita sei halo ba estudante sira iha prosesu orientasaun”, Reitór IOB hatete.
Iha fatin seluk, Reitór ISC, Sebastião Perreira, afirma ISC simu estudante foun iha tinan 2025 hamutuk 1650. Husi númeru ISC Dili, simu estudante foun 1000, ISC iha Aileu 200, Same 200 no Baucau 250.
“Institutu Superiór Cristal iha fatin haat, Institutu Superiór Cristal Sentrál Dili, ida iha Baucau, Same no Aileu, Nune’e iha Dili simu estudante hamutuk 1000 ne’e ba kursu 12 inklui programa mestradu no iha Aileu simu estudante foun 200, Same 200 no Baucau 250”, Reitór ISC dehan.
Nia hatutan, ISC simu tuir kapasidade, fasilidade no rekursu umanu ne’ebé iha no sufisiente ba estudante sira.
“Ida-ne’e ami simu tuir ami-nia kapasidade, fasilidade no rekursu umanu, ne’ebé ami iha ho sufisiente”, nia informa.
Reitór dehan, rejistrasaun ba simu estudante foun ne’e hahú ona no sei remata iha loron 28 fevereiru no sei kontinua kedas ba orientasaun no prosessu aprendizajen.
“Rejistrasaun hahú ona iha janeiru dia 6 liuba, inskrisaun ida-ne’e sei remata iha 28 fevereiru, no inísiu fulan-Marsu ne’e estudante hahú priénse fixa planifikasaun estudu nian no orientasaun hotu, ita kontinua kedas ba prosessu aprendizajen”, Reitór konklui.
Jornalista: Osória Marques
Editór : Zezito Silva