DILI, 15 Janeiru 2025 (TATOLI)- Konsellu Ministru aprova projetu dekretu-lei kona-ba orgánika Sekretaria Estadu Komunikasaun Sosiál (SEKOMS) nian ne’ebé aprezenta husi Sekretáriu Estadu tutela, Expedito Dias Ximenes.
Inisiativa lejizlativa ida-ne’e tuir aprovasaun husi dekretu-lei númeru 36/2024, loron 6 fulan-Novembru, ne’ebé introdús ona alterasaun dahuluk ba Dekretu-Lei n. 46/2023, loron 28 fulan-Jullu, ne’ebé kria ona SEKOMS.
“Objetivu prinsipál mak atu fornese SEKOMS estrutura orgániku-funsionál ne’ebé adekuadu hodi hala’o ninia atribuisaun no garante implementasaun ida ne’ebé efikás ba programa no atividade sira ne’ebé define ona iha Planu Estratéjiku 2024-2028 no iha Programa Governu Konstitusionál da-IX, ba área komunikasaun sosiál nian”, refere nota ne’ebé Tatoli asesu, ohin.
SEKOMS kompostu hosi órgaun no servisu lubuk ida ne’ebé apoia Sekretáriu Estadu Komunikasaun Sosiál hodi hala’o ninia podér sira. “Entre funsaun prinsipál sira SEKOMS nian maka konsesaun, ezekusaun, koordenasaun no avaliasaun ba polítika komunikasaun sosiál nian ne’ebé define no aprova husi Konsellu Ministru.
SEKOMS iha mós responsabilidade atu propoin polítika sira, elabora lejizlasaun no regulamentu sira ne’ebé nesesáriu ba área komunikasaun sosiál, no koordena diseminasaun informasaun kona-ba programa no asaun Governu nian.
Vise-Ministru ba Asuntu Parlamentár, Adérito Hugo da Costa, hateten lei orgánika ba SEKOMS nian ne’e dezde orsamentu retifikativu 2023 nian iha kompozisuan Governu nian tutela ba Ministeriu Prezidénsia Konsellu Ministru ho nia administrasaun finanseira no patrimoniu nian.
“Orsamentu 2025 nian, Governu aprezenta ba SEKOMS hala’o mos atividade sira ho karáter implementasaun projetu sira ne’e hotu ho ida ne’e mak halo ajustamentu ba SEKOMS ho OJE 2025 nian, goza nia estatutu hanesan entidade ne’ebé autónoma finanseira adminsitrativa patrimóniu ninian”, dehan.
Sekretáriu Estadu Komunikasaun Sosiál, Expedito Dias Ximenes, hateten iha Konsellu Ministru fulan tolu liubá halo alterasaun ba orgánika Nonu Governu nian, ne’ebé halo SEKOMS nia orsamentu ne’e ho títulu orsamentu ketak ona.
“Ho alterasaun orgánika Nonu Governu nian, entaun ha’u tenke halo aprezentasaun lei orgánika Sekretaria Estadu Komunikasaun Sosiál nian, nune’e nia bele ezekuta nia orsamentu, maibé iha organograma ne’e Sekretaria Estadu nafatin iha Ministériu Prezidénsia Konsellu Ministru”, governante ne’e esplika.
Sekretáriu Estadu ne’e adianta katak ho aprovasaun dekretu-lei ne’e atu forma tan diresaun foun mak hanesan administrasaun no finansa, aprovizionamentu no lojístika.
“Durante ne’e iha diresaun tolu de’it. Ho dekretu-lei ne’e aumenta tan diresaun rua. Iha tinan 2025, ezekusaun orsamentu ami-nian ne’e ketak ona, lahamutuk ona ho PCM”, salienta.
Lembra katak alokasaun Orsamentu Jerál Estadu ba SEKOMS iha tinan ne’e ho montante $6,038,535, ne’ebé prevee ba saláriu no vensimentu $1,619,260, bens no servisu $767,835, transferénsia públika $2,751,440, kapitál no dezenvolvimentu rihun $900.
Verba ne’e atu finansia programa funsionamentu no dezenvolvimentu instituisionál ho subprograma ida no atividade hitu.
Programa dezenvolvimentu setór komunikasaun sosiál ho subprograma mak dezenvolve mekanizmu lejizlasaun, regulamentasaun no regulasaun ho nia atividade rua, subprograma diversifika no fortalese meiu komunikasaun sosiál ho atividade haat, subprograma ba kapasitasaun jornalista no fortalesimentu koezaun sosiál ho atividade lima, subprograma superintendénsia no tutela órgaun komunikasaun sosiál Estadu ho atividade rua.
No ikus liu mak programa dezenvolvimentu sistema komunikasaun instituisionál Governu ho subprograma mak diseminasaun informasaun ba públiku ho atividade haat, subprograma ba dezenvolve sistema komunikasaun interna Governu ho atividade rua.
Jornalista: Arminda Fonseca
Editora: Maria Auxiliadora