iklan

HEADLINE, POLÍTIKA

Rezolusaun Governu ba ezekusaun EDA no reprezentativu podér lokál aprovada

Rezolusaun Governu ba ezekusaun EDA no reprezentativu podér lokál aprovada

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kinta (24/10). Imajen Tatoli/Francisco Sony

DILI, 15 Janeiru 2025 (TATOLI) – Ministru Administrasaun Estatál, Tomás do Rosário Cabral, aprezenta projetu rezolusaun Governu ba ezekusaun Estratéjia Desentralizasaun Administrativa (EDA) no Instalasaun órgaun reprezentativu podér lokál 2025-2028 nian, ne’ebé hetan ona aprovasaun husi Konsellu Ministru.

Tuir nota ne’ebé Tatoli asesu, medida ida-ne’e ho objetivu atu reafirma Governu nia determinasaun hodi konsolida estratéjia desentralizasaun administrativa no kontinua prosesu instalasaun órgaun reprezentativu podér lokál nian.

“Rezolusaun Governu ida-ne’e estabelese planu anuál sira, husi 2025 to’o 2028, ne’ebé inklui instalasaun servisu Balkaun Úniku iha territóriu nasionál tomak, reforsu institusionál autoridade munisípiu sira-nian, regulamentu lei sira ne’ebé relasiona ho podér lokál no atualizasaun baze-dadus resenseamentu eleitorál nian”, komunikadu ne’e hateten.

Iha etapa sira tuirmai, sei promove kriasaun kondisaun sira hodi hala’o eleisaun munisipál, kapasitasaun ba prezidente munisipál eleitu sira no avaliasaun ba progresu desentralizasaun nian.

“Koordenasaun ba ezekusaun estratéjia sei sai hanesan responsabilidade Ministériu Administrasaun Estatál nian, ne’ebé tenke aprezenta relatóriu semestrál kona-ba progresu ne’ebé alkansa ona no dezafiu sira ne’ebé hasoru, hodi garante kontinuidade no efikásia prosesu nian”.

Rezolusaun ida-ne’e revoga Rezolusaun Governu anteriór númeru 45/2020, loron 09 fulan-dezembru, no tama iha vigór iha loron ida hafoin nia publikasaun.

Vise-Ministru ba Asuntu Parlamentár, Adérito Hugo da Costa, dehan Rezolusaun Governu nian kona-ba etapa ka sekuénsia sira ne’ebé aprezenta ne’e, tanba dezde Restaurasaun Independénsia iha 2002 Governu sira uluk to’o agora kontinua polítika desentralizasaun administrativa no podér lokál ne’ebé lei lubuk ida mak Parlamentu aprova no vigór ona, hanesan Podér Lokál no Desentralizasaun Administrativa, Lei Divizaun Administrativa no Lei Fianansa Munisipál nian.

“Ita hotu hatene dezde inísiu Nonu Governu eleva ona nivel Administradór sa’e ba Prezidente Autoridade iha munisípiu 12, nomós halo alterasaun ba lei RAEOA nian. Ha’u hanoin kalendáriu ne’e importante loos ba sekuénsia sira atu ita atinje depoizde investimentu lubun ida ba polítika desentralizasaun, uluk deskonsentralizasaun tranzitória ba desentralizasaun nian”, nia esplika.

Tuir governante ne’e, sekuénsia sira ne’e ohin hetan ona aprovasaun, maibé implementasaun presiza halo avaliasaun iha terrenu, hanesan Primeiru-Ministru Kay Rala Xanana Gusmão kompremete ona ba públiku katak inísiu tinan ne’e Xefe Governu rasik tun bá terrenu hodi haree progresu sira ba futuru instalasaun kámara munisipál nian iha munisípiu hotu.

Rezolusaun ba iha sekuénsia ka kalendáriu sira ne’e aprova ona no bele mós halo fali alterasaun, tanba depende ba progresu serbisu avaliasaun iha terrenu, tanba sei haree dezempeñu serbisu sira ba iha setór importente sira ne’ebé prienxe rekizitu munisípiu ida bele tama ba desentralizasaun administrativa no podér lokál tuir lei.

Jornalista: Arminda Fonseca

Editora: Maria Auxiliadora

iklan
iklan

Leave a Reply

iklan
error: Content is protected !!