BOBONARO, 16 janeiru 2024 (TATOLI)—Eletrisidade Timor-Leste, Empreza Públika (EDTL, E.P) sei implementa Projetu Eletrifikasaun Nasionál (PEN) iha janieu 2025 hodi instala energía elétrika ba aldeia lima iha suku Ai-Asa no suku Ilat-laun, postu administrativu Bobonaro, munisípiu Bobonaro ne’ebé sei kobre uma-kain 270 resin.
Jestór EDTL, E. P munisípiu Bobonaro, Mario de Jesús, hateten aldeia benifisiáriu ba projetu PEN ne’e husi suku Ai-Asa nian mak Mazop, Odelgomo, Laho ho totál benifisiariu 200 no suku Ilat-laun nia mak aldeia Purugua ho benefisiáriu 70-resin ne’ebé dezde tempu okupasaun Indonezía to’o ágora seidauk asesu liña eletrisidade.
Nia hateten, iha loron rua liubá ne’e empreza estatál hamutuk ho kompañia manán-na’in halo ona enkontru ho autoridade postu administrativu Bobonaro no líder komunitária inklui komunidade molok implementa projetu ne’e.
Notísia Relevante: EDTL fornese ona enerjia elétrika ba uma-kain 1,676 iha Bobonaro
“Ita-nia kompañia lokál Tito Loro ne’ebé mak sai manán-nain ba lokasi rua ida-ne’e, agora daudaun mobiliza ona sira-nia materiál ba lokasi. Fulan ida-ne’e nia laran implementa ona,” Mario de Jesus informa ba Agência TATOLI iha nia kna’ar fatin, kinta ne’e.
Tanba ne’e, nia husu ba kompañia manán-nain atu ezekuta obra ne’e ho responsablidade, atu nune’e bele finaliza tuir kontratu ne’ebé selebra ona.
“Ami mós prontu apoia ita-boot sira. Serbisu halo didi’ak ba, tanba ita-nia povu sira presiza tebes atu hetan naroman husi liña eletrisidade ne’e,” nia dehan.
Xefe suku Ilat-laun, Adelino Mai Bere, hateten komunidade iha aldeia Purugua prontu koopera no kolabora ho EDTL, E.P liuliu kompañia, tanba mehi ne’ebé sira mehi durante tinan barak atu sai ona realidade.
“Komunidade apoia tanba sira hein hela ahi ida-ne’e durante tinan barak ona. Sira prontu kontribui oferese ai-horis sira ka plantasaun atu bele tesi gratuita, tanba ami enkontru ho diretór EDTL, E.P dehan laiha ganti rugi (indemnizasaun),” nia hateten.
Entretantu, tuir dadus ne’ebé EDTL, E.P rekolla ne’e, daudaun ne’e suku 50 iha munisípiu Bobonaro asesu ona enerjía elétrika no sei falta falta de’it aldeia 11 mak seidauk asesu liña eletrisidade.
Notísia Relevante: Uma-kain 70 iha Purugua Ilat-laun sei toba ho nakukun
Jornalista : Sergio da Cruz
Editór : Cancio Ximenes