iklan

EDUKASAUN, KOVALIMA

Edukasaun Covalima preparadu atu implementa PME

Edukasaun Covalima preparadu atu implementa PME

Xefe Departamentu Jestaun Programa Merenda Eskolár Covalima , Gregório Ferreira Afonso. Imajen TATOLI/Celestina Teles

COVALIMA,  16  janeiru 2025 (TATOLI) –  Servisu Munisipál Edukasaun Covalima prepara ona pedidu nune’e  bele  implementa Programa Merenda Eskolár (PME) maibé sei hein sistema finansa ne´ebé daudaun ne’e seidauk loke.

“Ami atu submete pedidu ba Finansa, sira responde dehan hein lai nune’e ita seidauk implementa Programa Merenda Eskolár. Bazeia ba ita-nia planu, hahú implementa iha loron 13 janeiru ne’e atu halo lansamentu iha Eskola Bázika Sandalo”,  Xefe Departamentu Jestaun Programa Merenda Eskolár Covalima, Gregório Ferreira Afonso, dehan, iha Santa Rosa, ohin.

Atu implementa PME liuhusi Ekipa Jestaun Programa Servisu Munisipál Edukasaun Covalima prontu ona no  aprezenta ona ba Prezidente Autoridade Munisípiu Covalima maibé sei  hein sistema finansa bainhira loke ona halo prosesu pedidu hahú  implementa.

Daudaun ne’e prosesu implementa PME iha Covalima seidauk hahú tanba sei hein sistema finansa seidauk loke etaun presiza atu hein tanba prosesu hotu Edukasaun Covalima finaliza ona hein de’it ona atu implementa.

Orsamentu  Jerál Estadu 2025 atu implementa PME iha Covalima hamutuk $ 1,165,367,68 ho nia benefisiáriu husi eskola pre-eskolár hamutuk 1,920 ho totál orsamentu hamutuk  $ 119,347.20 no benefisiáriu ba Eskola Bázika (EB) hamutuk 16,828 ho orsamentu $ 1,046.028,48.

Realizasaun PME 2025 ne’e durante loron efetivu hamutuk 148 ne’ebé implementa husi ekipa Jestaun programa 23 ne’ebé kria no kada alunu iha direitu ba han ho montante orsamentu sentavu 0,35.

Fó hanoin fali katak,OJE  aloka atu implementa PME iha 2024  hamutuk milliaun $ 1 husi orsamentu ne’e,  servisu edukasaun Covalima devolve orsamentu ba kofre Estadu hamutuk $ 86,852,48,  husi orsamentu ne’e osan cas ne’ebé iha EJP nia liman hamutuk $ 10.613.59 no osan ne’ebé iha banku hamutuk $ 76,238.89.

Jornalista: Celestina Teles

Editór : Rafael Ximenes de  A. Belo

 

iklan
iklan

Leave a Reply

iklan
error: Content is protected !!