DILI, 16 janeiru 2025 (TATOLI)—Diretór Servisu Apoiu Diagnóstiku no Terapeútiku Hospital Nacional Guido Valadares (HNGV), Vidal de Jesus Lopes, klarifika katak Fashion Show iha aredór HNGV ne’ebé iha foin lalais sai virál ne’e ho objetivu atu promove farda uniforme ne’ebé HNGV prepara ba funsionáriu sira.
“Fashion show ida-ne’e akontese duni iha loron 10 janeiru, iha resintu HNGV. Objetivu husi eventu ne’e atu promove uniforme ne’ebé HNGV prepara ba funsionáriu sira iha HNGV, hahú husi médiku espesialista, médiku jerál, parteira, enfermeiru, tékniku aliadu, seguransa, cleaner no funsionáriu hotu ho nia fardamentu ne’ebé mak uniforme,” Vidal informa ba TATOLI liuhusi Programa Entrevista Esklusiva iha HNGV, Bidau Toko Baru, Dili, kuarta (15/1/2025).
Nia esplika, HNGV halo ida-ne’e atu funsionáriu ho funsionáriu bele koñese malu no pasiente mós bele distingi médiku mak ida-ne’ebé, enfermeiru no parteira mak ida-ne’ebé.
“Dala barak ona pesoál saúde sira utiliza tuir sira-nia hakarak no la uniformizadu. Entaun, ida-ne’e mak ita promove liuhusi fashion show. Atividade ne’e la’ós halo iha fatin movimentu pasiente sira-nian, maibé halo iha parte Meeting Room HNGV no atividade hala’o de’it minutu 30 to’o 45. Atividade ne’e mós la fó impaktu ba atendimentu HNGV nian, tanba antes halo atividade ne’e doutór sira haree hotu ona kondisaun pasiente nian mak atividade ne’e la’o,” nia esklarese.
Notísia relevante:Deputada CNRT la konkorda profisionál saúde halo “fashion show” iha HNGV
Nia haktuir, krítika sira-ne’e HNGV simu, maibé HNGV iha devér atu esplika ba públiku katak laiha impedimentu no fó impaktu boot ba funsionamentu HNGV.
“Ami la hanoin aat ba pasiente, maibé tempu ho espasu mak la aserta, entaun interpretasaun públiku nian mai ne’e ladún sensível,” Vidal hatutan.
Nia relata, farda sira-ne’e utiliza orsamentu 2024 nian ba funsionáriu hamutuk 1.500 to’o 2.000 inklui kontratadu sira.
Iha sorin seluk, funsionáriu iha HNGV, Teobursi Soriano, hateten farda ne’e importante ba funsionáriu sira tantu médiku espesialista, enfermeiru, parteira, tékniku aliadu, seguransa no cleaner sira atu uniforme tuir idak-idak nia departamentu.
“Farda ne’e mai ha’u importante, tanba ita haree iha HNGV funsionáriu barak, entaun liuhusi farda ida-ne’e ita bele identifika ema idak-idak nia profisaun no mós hatudu identidade di’ak ba iha instituisaun ida-ne’e,” nia tenik.
Jornalista: Felicidade Ximenes
Editór: Xisto Freitas da Piedade
