DILI, 16 janeiru 2025 (TATOLI)—Joven mane ho naran Abríl Ximenes (25), hetan hana ho rama ambon iha Aldeia Cancai, Suku Balibar, Postu Administrativu Cristo Rei, Munisípiu Dili.
Kazu ne’e akontese iha kuarta (15/1), tuku 21:00 Otl, bainhira vítima túr hela iha nia uma derepente hana ho rama ambon to’o rama belit iha nia isin nune’e joven ne’e monu kedan iha fatin.
Komandante PNTL Munisípiu Dili, Superintendente Xefe Orlando Gomes, hateten joven ida hetan hana ho rama ambon bainhira nia túr hela iha nia uma oin ho kolega sira.
“Bainhira akontese komandu PNTL simu informasaun orienta kedas patrollamentu Eskuadra Polísia Cristo Rei hamutuk ho servisu informasaun polísia to’o iha fatin halo atuasaun buka tuir suspeitu sira ne’ebé envolve iha konfrontu ne’e. Ita salva kedas vítima halo evakuasaun bá iha Hospital Nacional Guido Valadares hodi halo tratamentu saúde,” Orlando Gomes hateten ba jornalista sira iha nia kna’ar fatin, Komandu PNTL, Caicoli, Dili, kinta ne’e.
Nia haktuir, kazu ida-ne’e PNTL asegura kedan suspeitu na’in rua lori ona bá iha Eskuadra Polísia Cristo Rei atu halo identifikasaun.
Orlando dehan, kazu ne’e nu’udár kazu ódiu malu ne’ebé akontese antes ona iha loron ida ka rua liubá liuhusi festa ida iha Balibar, iha-ne’ebé konfrontu entre joven husi Aldeia Tancai ho Lacotu, Suku Balibar, Postu Administrativu Cristo Rei, nune’e iha 15 janeiru suspeitu sira ne’ebé polísia kaptura mak uza fali rama ambon hodi hana vítima rezulta to’o kanek grave.
“Suspeitu na’in rua ne’ebé ita asegura ne’e ho inisiál BP no LM. Agora daudaun ita detein ona iha sela Komandu PNTL Dili hodi submete ba oras 72 molok aprezenta bá Tribunal,” nia informa.
Komandante Polísia Munisípiu Dili ne’e hateten polísia nafatin buka tuir tan suspeitu sira seluk nune’e bele kaptura hodi submete ba prosesu identifikasaun.
“Polísia Nasionál Timor-Leste kontinua halo operasaun vizilánsia iha fatin risku ba konflitu iha área Jurídiku Munisípiu Dili. Bainhira joven sira halo violénsia polísia sei halo atuasaun tuir lei ne’ebé vigora. Ita sei la tolera sira,” nia realsa.
Jornalista: Natalino Costa
Editór: Xisto Freitas da Piedade