Rezultadu implementasaun projetu ortikultura hosi Hunan iha Manatuto
MANATUTO, 15 janeiru 2025 (TATOLI) – Xina liuhusi Provínsia Hunan estabelese ona kooperasaun ho Munisípiu Manatuto iha tinan kotuk, hodi implementa projetu veterinária, ortikultura no seluktan iha munisípiu ne´e, ho objetivu atu hasa´e produsaun.
Akordu kooperasaun ne´e asina hosi Primeiru-Ministru Kay Rala Xanana Gusmão no Vise-Primeiru-Ministru, Francisco Kalbuady Lay, iha loron 5 maiu 2024.
Reprezentante Projetu kooperasaun Hunan, Fang Yuanxiang, informa katak projetu ortikultura ne´e implementa iha área ektar lima no tuir planu projetu ne´e sei implementa tan iha Munisípiu Ainaro, Suai (Covalima), Same (Maunfahe), Baucau no Viqueque.
“Ita sei konvida autoridade lokál husi Ainaro, Baucau, Viqueque, Suai, Same ba iha Hunan, bele aprende oinsá bele dezenvolve agrikultura iha Munisípiu sira,” Reprezentante Projetu kooperasaun Hunan, informa, ba jornalista sira iha Manatuto Vila, kuarta ne´e.
Fang Yuanxiang relata, produsaun agrikola ne´e foin mak hahú no posibilidade iha tinan rua nia laran mak dezenvolve di´ak maka husi rezultadu ne’e sei haruka ba merkadu depende ba demanda sira.
Enkuantu, implementasaun projetu ne´e, totál trababalladór na´in sanolu resin no sira hetan ona formasaun oinsá atu kuidadu viveíru sira iha greenhouse nia laran, husi nia prosesu to´o ba kolleta nian.
Iha fatin hanesan, Diretór Agrikultura Munisípiu Manatuto José Soares, konfirma katak projetu ida-ne’e foka ba agrikultura maibé la taka dalan mós kultura entre Manatuto ho Provinzia Hunan.
Husi koperasaun ida-ne’e ba oin, tuir ezekutivu ne´e, tenta atu hasa’e produsaun iha área la’ós ortikultura de’it maibé mós veterinária no área seluktan relevante.
“Agora daudaun espesialista hosi Hunan nian na´in rua hanesan ne’e iha Manatuto no espera katak agrikultura Manatuto-oan sira bele hetan tékniku ruma oinsá bele haki´ak animál, kuda modo iha tempu udan, labele mós hapara nia produsaun,” nia espera.
Diretór Agrikultura Munisípiu Manatuto José Soares konsidera, enjerál iha Timor-Leste no liliu iha Munisípiu Manatuto, baibain iha tempu udan nia produsaun tuun tanba kondisaun klíma maibé ho tékniku sira, iha tempu udan bele iha produsaun, la´ós de´it ba modo sira maibé mós natar.
Nia haktuir, hanesan Diretór Agrikultura Manatuto, hetan ona mós treinamentu dala rua iha Hunan, Xina no ida iha Manatuto.
Husi treinamentu dala-rua ne’e, hetan esperiénsia husi espesialista sira iha área oioin no rezultadu treinamentu sira ne’e tenta implementa ona iha terrenu no nia rezultadu hatudu katak sira halai natar ektar 0.6 no bele prodús husi tonelada neen to´o hitu.
“Benifísiu ba povu Manatuto mak ita tenta ona alarga ita-nia tékniku ne’e ba agrikultura sira iha kampu ne’e para bele hasa’e produsaun liuhosi tékniku sira ne’ebé ita iha”.
Entretantu, atu hasa´e produsaun agrikola ne´e, antes ne´e Governu Xina liuhusi Provínsia Hunan oferese mós ekipamentu no fasilidade téknika sira hodi hala´o serbisu, tuir kompromisu ne´ebé mak iha.
Jornalista: Francisco Sony
Editór: Rafael Ximenes de A. Belo
