COVALIMA, 15 janeiru 2025 (TATOLI) – Veteranu husi Munisípiu Covalima daudaun-ne’e organizada malu hodi halo asaun protestu hodi kontesta lista aprovasaun Kombatente Libertasaun Nasionál (KLN), ne’ebé fó sai hosi Ministériu Kombatente Libertasaun Nasionál (MCLN, sigla portugés).
Veteranu no Eis-Sekretáriu Zona Fronteira Fatumea, Manuel Barboja Pina “Mameran”, informa, razaun veteranu Covalima organiza malu, tanba ema ne’ebé mak uluk luta ba funu tuur iha estrutura sira-nia naran la tama iha lista 8 a 14 maibé ema ne’ebé la envolve iha funu nia naran mak tama fali iha lista 8 a 14.
“Ohin ami mai halo asaun greve iha konsellu veteranu munisipál nune’e hodi halo klarifikasaun ba ami bazeia ba saida mak (ema) ne’ebé mak uluk la hala’o funu maibé nia naran tama iha lista 8 a 14 maibé ne’ebé mak hala’o funu nia naran tama iha lista 3 a 7 no partisipasaun funu tinan rua-resin” Manuel Barboja Pina “Mameran” hato’o lamentasaun ne’e iha edifísiu Konsellu veteranu Covalima Tabakolot, ohin.
Ho desizaun ne’ebé MCLN aprova lista kombatente libertasaun nasionál, Veteranu husi Covalima organiza malu hodi husu Konsellu Kombatente munisipál atu imprimi fixa .
Veteranu husu atu imprimi fixa atu hatene mekanizmu komisaun sira halo verifikasaun ba ema sira ne’ebé la partisipa iha funu , maibé nia naran tama iha lista 8 a 14 ne’e oinsá no ema ne’ebé mak partisipa iha funu, maibé nia naran la tama iha lista 8 a 14 ne’e tanba saida.
“Ami presiza atu submete karta ba prezidente Konsellu Kombatente Libertasaun Nasionál no ba Ministériu Kombatete Libertasaun Nasionál no ba Parlamentu Nasionál atu buka solusaun,” nia informa.
Iha sorin seluk, Apolonario Godinho Maia reforsa, presiza halo klarifikasaun tanba lista kombatente libertasaun Nasionál ne’ebé mak publika hakanek veteranu sira ne’ebé uluk luta hodi sei karas ba inimigu nia laran.
“Ami la satisfas tanba ema ne’ebé uluk luta ba rai ida-ne’e nia naran la iha maibé ema ne’ebé la envolve iha funu nia naran mak iha fali ida-ne’e mak ami preokupa tanba ne’e ministériu presiza atu haree problema ne’e ho urjente,” nia lamenta.
Sekretáriu Kombatente Libertasaun Munisipál, Joaquim Gusmão “Sikatlet” esplika , Konsellu Kombatente Libertasaun Munisipál (KKLM) publika naran bazeia simu orientasaun husi Ministériu Kombatente Libertasaun Nasionál
“Hafoin publika sai lista veteranu, husi munisípiu Covalima halo reasaun, tanba ita-nia veteranu sira la satisfas ho rezultadu publikasaun lista editál Kombatente libertasaun nasionál ne’ebé rejista 2009. Ita hatene komisaun halo de’it verifikasaun hafoin ami asina de’it akta mai de’it ho númeru la fo lista naran,” nia klarifika.
Ho asaun ne’ebé veteranu halo, Sekretáriu Kombatente Libertasaun Munisipál sei bolu responsavel zona hitu tuur hamutuk buka solusaun kona-ba veranu munisípiu Covalima halo asaun greve iha edifísiu KKLM
Tuir dadus kombatente Libertasaun nasionál ne’ebé fó husi Ministériu Asuntu Kombatente Libertasaun Nasionál mai husi postu administrativu Fatululik, Fatumea, Fohorem, Tilomar, Maucatar, Suai no Zumalai hamutuk 7.945.
Jornalista: Celestina Teles
Editór : Rafael Ximenes de A. Belo