iklan

HEADLINE, SAÚDE

2024, INFPM sosa medikamentu item 2.330 iha rai-li’ur

2024, INFPM sosa medikamentu item 2.330 iha rai-li’ur

Armazén ai-moruk INFPM. Imajen Tatoli/António Gonçalves.

DILI, 13 janeiru 2025 (TATOLI)—Diretór Aprovizionamentu Institutu Nasionál Produtu Médiku no Farmaseútiku (INFPM), Mariano da Silva Marques, hateten husi janeiru to’o dezembru 2024, INFPM konsege sosa ai-moruk hamutuk 2.330 husi rai-li’ur liuhosi empreza lokál no internasionál sira.

“Iha tinan 2024, tuir dadus ne’ebé iha, husi fulan-janeiru to’o dezembru, ita sosa ona item ai-moruk hamutuk 2.330 liuhusi empreza lokál no internasionál, ne’ebé hatama ona iha armazén INFPM. Ai-moruk sira-ne’e sosa iha Indonézia pur volta 80%, sira seluk ne’e mai husi Índia, Malázia, Portugal, Xina no mós Austrália,” Mariano Marques ba Tatoli, iha nia knaar fatin, Kampung Alor, Dili, segunda foin lalais.

Nia esplika, to’o oras ne’e item ai-moruk ne’ebé sosa ne’e tuir nesesidade ne’ebé iha, nune’e iha tan item ai-moruk hanesan Ampicillin, Paracetamol, Fluidu no item seluk ne’ebé importante tebes ba pasiente sira-nia moris.

“Kuaze ai-moruk ne’ebé ita sosa ne’e importante liu no ita sosa tuir kualifikasaun ne’ebé iha. Dalaruma ita konfuzaun kona-ba kuantidade ai-moruk ne’e, tanba ai-moruk balun uza ho kuantidade boot liu no ai-moruk balun mak uza de’it ho kuantidade ki’ik maibé importante tebes, hanesan item ai-moruk espesialista sira-nian,” nia esklarese.

Nia relata, iha tinan 2024, Governu aloka fundu sira hodi sosa ai-moruk ho valór millaun $13.

Durante tinan 2024, empreza lokál no internasionál ne’ebé partisipa iha prosesu aprovizionamentu hodi sosa sasán ai-moruk mak hanesan Sali Magu Unipessoal Lda, Inti Source Ricna Lda, Ortho Clinical Diagnostica, Daikyo Industrial Lda, Salme Tiles Unipessoal Lda, Adacare Farma Unipesoal Lda, Boucher, Muir no Ocean Lda, Bethesda Husada Farmasia, PT Emjebe Pharma, Greentech Worldwide, Foho Osan Mean Farmasia, Istana Farmasia, South Austral, Stamford Medical Lda, Belsantos Farmasia Unipessoal Lda, PT Damha, Fastep Lda, PT Mitra Jaya Abadi Mandiri 3D Life Lda.

Jornalista: Felicidade Ximenes

Editór: Xisto Freitas da Piedade

 

iklan
iklan

Leave a Reply

iklan
error: Content is protected !!