Falur enkoraja membru PM hatudu disiplina no kumpre ierarkia komandu
DILI, 17 janeiru 2025 (TATOLI)—Xefe Estadu Maiór Jenerál FALITIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, husu ba membru Polísia Militár atu hatudu komportamentu no disiplina ne’ebé di’ak, respeita ierarkia komandu nune’e hamutuk dezenvolve instituisaun F-FDTL ho di’ak liután iha futuru.
“Hanesan Xefe Estadu Maiór Jenerál Forsa Armada, ha’u husu ba membru Polísia Militár sira tenke hatudu komportamentu ne’ebé di’ak no hatudu imi-nia disiplina iha pratika lori serbisu instituisaun ne’e ho di’ak liután,” Falur Rate Laek dehan liuhusi nia intervensaun bainhira partisipa serimónia aniversária Polísia Militár ba dala 20, ne’ebé hala’o iha Kuartél Polísia Militár, Kintál Boot, Dili, sesta ne’e.
Nia husu ba Polísia Militár tenke kontrola ofisiál militár ne’ebé komete iha infrasaun militár, la obedese ba lei militár no husu atu kuandu hetan kestaun sira hanesan ne’e informa bá komandante ka komponente komandante inklui seksaun sira atu loke prosesu ba sira.
Falur nota katak iha ofisiál militár balun ladún obedese ba iha regra militár nian, dalaruma la tau an hanesan militár, túr hemu tua ho ema sivíl sira no dala barak mós membru F-FDTL balun halo fali intervensaun ba serbisu balun ne’ebé Polísia Militár halo iha terenu, tan ne’e kuandu mosu hanesan ne’e iha terenu mak Polísia Militár tenke toma nota hodi informa kedan ba komandante sira hodi halo prosesu.
Nia hatutan, militár balun mós uza karreta militár tula ema sivíl no dalaruma tula fali ikan iha karreta laran.Tuir loos ne’e labele no só uza ba serbisu militár.
“Husu ba Polísia Militár tenke tau-matan ba membru militár no ofisiál sira militár ne’ebé uza karreta militár tenke halo serbisu militár nian. Labele uza karreta militár ba para iha uma hodi la’o bá serbisu sivíl, pior liu tula ema sivíl iha laran. Kuandu hetan Polísia Militár tenke atua,” Falur realsa.
Iha oportunidade ne’e, Falur hateten, kadeia komandu iha instituisaun F-FDTL ladún la’o, tanba ne’e mak husu ba Polísia Militár tenke hadi’a ida-ne’e para dezenvolve.
“Ierarkia Komandu tenke la’o. Tinan rua nulu imi-nia ezisténsia imi tenke buka hadi’a ida-ne’e. Parabéns ba imi-nia aniversáriu. Hanesan ha’u dehan tenke hatudu imi-nia komportamentu no disiplina,” nia esklarese.
Aleinde ne’e, Xefe Estadu Maiór Jenerál F-FDTL ne’e mós husu ba Polísia Militár halo atuasaun iha terenu tenke tuir regra empeñamentu sira no respeita populasaun sira.
“Ha’u lakohi Polísia Militár sai batedór. Ba imi-nia aniversáriu ida-ne’e imi tenke halo reflesaun nune’e bá oin serbisu ho di’ak liután,” Falur enkoraja.
Nia louva dezenvolvimentu Unidade Polísia Militár agora hahú hatudu progresu entermu infraestrutura, fasilidade no meiu sira.
Iha fatin hanesan, Komandante Polísia Militár (PM), Majór Mateus de Jesus, hateten kriasaun Polísia Militár bazeia ba lei númeru 15/2006, hahú ho efetivu pelutaun ida mak hanaran Maubere I. No, iha 2005-2025, Polísia Militár hahú formasaun Maubere I to’o formasaun Maubere VII. Membru PM agora hamutuk na’in 259 ona.
“Komemorasaun ida-ne’e la’ós atu festeja de’it, maibé nu’udár oportunidade mai ita atu hanoin hikasfali saida de’it mak ita halo ona iha pasadu. Pasadu hanesan lisaun ida hodi hadi’a buat ne’ebé ita haree katak presiza duni ita hotu atensaun. Parabéns ba ita-boot sira-nia disiplina, dedikasaun, espíritu korpu, korajen ho abnegasaun hodi serbí Unidade Polísia Militár ho di’ak,” nia konklui.
Jornalista: Natalino Costa
Editór: Xisto Freitas da Piedade
