INFPM destroi medikamentu hamutuk item 165 iha lixeiru Metinaro
DILI, 17 janeiru 2025 (TATOLI)—Institutu Nasionál Farmásia Produtu Médiku (INFPM), sesta ne’e, halo destroisaun ai-moruk, konsumável no ekipamentu laboratóriu hamutuk item 165, iha lixeiru suku Oenunu, postu administrativu Metinaro, munisípiu Dili.
”Ohin loron ita halo destroisaun ba ai-moruk, konsumável no ekipamentu laboratóriu nian hamutuk item 165,” Diretór INFPM, Brígido Dias dehan ba jornalista sira.
Nia hatutan, ai-moruk sira-ne’e akumulasaun hosi tinan 2020-2024 no tuir polítika Ministériu Saúde presiza halo destroisaun nune’e labele fó impaktu ba ema-nia saúde no ambiente.
“Husi 2024, ita halo destroisaun ba ai-moruk ne’ebé ho kuantidade boot no ai-moruk ne’e rasik la’ós ita sosa iha tinan ida de’it, maibé ne’e akumulasaun husi tinan 2020-2024. Akumulasaun ne’e la’ós husi orsamentu jerál Estadu (OJE) de’it, maibé mós doasaun husi ita-nia parseiru ka doadór sira hanesan Organizasaun Saúde Mundiál (OMS), Unicef no UNFPA,” nia informa.
Nia esplika, husi destroisaun ne’e dalabarak públiku preokupa, tanba ho item ne’ebé mak barak, maibé ida-ne’e la’ós tinan ida nian, más ne’e akumulasaun husi 2020 mai to’o dezembru 2024.
”Ai-moruk ne’ebé destroidu ona ne’e ekivale ho orsamentu $1.332,904,81. Husi ne’e sosa ho OJE nian hahú husi 2020-2024 ho orsamentu $438.892,70, ho nia item hamutuk 127, husi Fundu Globál orsamentu hamutuk $25.758,73, ho item 12, UNDP ho orsamentu hamutuk $8.065,40 ho item lima, husi OMS ho orsamentu hamutuk $225.956,54 ho item sia, UNFPA ho orsamentu hamutuk $168.302,51 ho item neen, husi UNICEF ho orsamentu hamutuk $465.928,93,” nia haktuir.
Brígido esklarese, ai-moruk ne’ebé liu prazu ne’e tanba Governu prepara ba surtu, ezemplu surtu ida mai prepara ai-moruk barak tiha hanesan Covid-19, entaun doadór sira mós apoiu fó barak tiha, depois surtu ne’e hotu sasán sira-ne’e atu uza ba saida. Tan ne’e, INFPM rai de’it to’o prazu liu.
”Banhira surtu hotu ita rai loos de’it to’o liu prazu, hanesan gon ka roupa ne’ebé mak uza atu salva ita-nia an atu labele iha kontaminasaun. Ida-ne’e armazén iha Dili nakonu inklui rejionál sira iha munisípiu tolu hanesan Baucau, Ainaro no Bobonaro,” nia tenik.
Nia klarifika katak ai-moruk ne’ebé destroidu ne’e la’ós mai husi empreza Sali-Magu tanba Sali-Magu hatama ai-moruk hahú iha 2023 no ai-moruk utilizadu ona.
Jornalista: Felicidade Ximenes
Editór: Xisto Freitas da Piedade
