iklan

EDUKASAUN, DILI

Ministériu Edukasaun inaugura kampu multifunsaun no koziña merenda eskolár iha EBC Farol 

Ministériu Edukasaun inaugura kampu multifunsaun no koziña merenda eskolár iha EBC Farol 

Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes ho Prezidente kompania ETO, Nilton Gusmão dos Santos bainhira inaugura kampu Multifunsaun iha eskola EBC Farol. Kampu Multifunsaun ne´e halo husi kompania ETO, Dili, sesta (17 janeiru 2025). ImajenTatoli/ Antonio Daciparu

DILI, 17 Janeiru 2025 (TATOLI) – Ministériu Edukasaun (ME), ne’ebé akompaña hosi Empreza ETO, sesta ne’e, inagura ona kampu multifunsaun no koziña merenda eskolár ba Eskola Ensinu Báziku Sentrál (EBC) Farol.

“Ohin ita mai inagura koziña merenda eskolár no kampu multifunsaun. Agora obra rua ne’e, ida koziña ne’e Programa Nasionál Dezenvolvimentu Suku (PNDS) mak konstrui no kampu multifunsaun ita-nia parseiru hanesan Kompañia ETO mak konstrui. Orsamentu ne’ebé konstrui uma merenda eskolár ne’e $16.318,29. Hosi osan ida-ne’e sei balansu ka saldo sei iha entaun eskola deside hodi sosa sasán koziña nian hanesan bikan-kanuru, sanan-tasu, fugaun no seluk tan”, Ministru Interinu Edukasaun, Domingos Lopes Lemos, dehan iha EBC Farol, Dili, sesta ne’e.

Ministru Interinu husu ba estrutura EBC atu utiliza fasilidade ne’ebé iha ona no kuidadu hodi dura tinan naruk. Tanba sasán ne’e la fasil atu hetan.

Diretora EBC Farol, Brigada Faustina Soares, agradese ba Kompañia ETO ho Governu liuhusi PNDS ne’ebé konstrui ona obra rua ne’e hodi bele fasilita eskola ida-ne’e.

Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes ho Prezidente kompania ETO, Nilton Gusmão dos Santos bainhira inaugura kampu Multifunsaun iha eskola EBC Farol. Kampu Multifunsaun ne´e halo husi kompania ETO, Dili, sesta (17 janeiru 2025). ImajenTatoli/ Antonio Daciparu

“Eskola ida-ne’e agradese tebes ba parte Kompañia ETO ho Programa Nasionál Dezenvolvimentu Suku tanba bele kolabora nune’e ohin loron ita-nia Ministru Interinu Edukasaun, Domingos Lopes Lemos inagura no ba oin ami bele iha kampu Multifunsaun no koziña merenda eskolár, ne’ebé ami-nia oan estudante bele utiliza ba desportu koziña ba prepara hahán hodi estudante bele konsumu”, Diretora EBC Farol dehan.

Diretora EBC, hatutan fasilidade rua ne’e bele fasilita ona EBC. Nune’e biban ne’e hakarak rekomenda atu kontinua apoiu eskola ne’e tanba daudaun ne’e kazadebanu ladún di’ak, inklui bibleoteka laiha.

“Ita husu nafatin apoiu ba parte rua ne’e hodi konstrui tan ami-nia kazadebanu ho bibleoteka tanba daudaun ne’e nia kondisaun ladi’ak. Ami presiza bibleoteka tanba ita iha estudante ativu iha EBC ne’e hamutuk 1767”, nia rekomenda.

Prezidente Empreza ETO, Nilton Gusmão, hateten Empreza ETO nia apoiu mai husi kliente sira ne’ebé ense mina kada litru, husi ne’e mak foti sentavus hodi apoia ba eskola.

“Ami-nia apoiu ne’e felizmente maihosi ita-nia kliente ne’ebé ense mina kada litru ami foti um sentavus hodi rezerva apoiu ba eskola sira. Apoiu eskola EBC Farol inklui eskola Fatumaka tanba ha’u maihosi ne’ebá no eskola ida tan iha Hera”, Nilton Gusmão dehan.

Espera katak ho apoiu ida-ne’e bele fasilita ona estudante sira iha EBC Farol no bele reforsa sira-nia teoria iha saladeaula loroloron nian.

“Ha’u hanoin atu halo atividade desportu ne’e importante lahalimar tanba bele ajuda forma labarik sira-nia saúde, kria amizade entre estudante. Bainhira ami deside halo ida-ne’e, la’ós buat boot ida. Ami espera katak kontribuisaun ne’ebé ami halo bele responde nesesidade eskola ida-ne’e nian”, Nilton afirma.

Totál orsamentu ne’ebé apoiu ba konstrusaun Kampu Multifunsaun iha EBC Farol hamutuk rihun $27 no konstrui hosi Kompañia EGANA unipesoal LDA.

Reprezentante PNDS, Eldina da Silva, hatete koziña merenda eskolár ohin entrega ona EBC Farol, espera katak bele utiliza ho di’ak no hein ai-han ne’ebé saudável ba estudante sira.

Ne´e mak Kampu Multifunsaun ne´ebé halo husi Prezidente kompania ETO, Nilton Gusmão dos Santos iha eskola EBC Farol, Dili, sesta, (17 janeiru 2025). ImajenTatoli/ Antonio Daciparu

“Koziña ne’e importante iha eskola ne’e tanba tein ai-han hodi oferese ba estudante sira nune’e fó saudável ba sira hodi bele asesu prosesu aprendizajen loron-loron nian iha eskola”, nia dehan.

Biban ne’e, nia agradese ba parte konsellu suku ne’ebé submete pedidu proposta ba konstrusaun koziña merenda eskolár ne’ebé tau prioridade ba sira-nia programa suku nian, nune’e ohin loron PNDS finaliza iha tinan 2024 no ohin inagura no entrega ba EBC Farol.

Jornalista: Osória Marques

Editór : Zezito Silva

iklan
iklan

Leave a Reply

iklan
error: Content is protected !!