IGEADI normaliza estrada kilómetru hitu iha Lacluta
VIQUEQUE, 18 janeiru 2025 (TATOLI)—Institutu Jestaun Ekipamentu no Apoiu Dezenvolvimentu Infraestrutura (IGEADI-sigla portugés), Institutu Públiku, kontinua normaliza estrada aat sira kuaze kilómetru hitu hahú husi suku Uma Tolu to’o postu administrativu Lacluta Vila, munisípiu Viqueque.
Administradór postu Lacluta, Pascoal Gama Martins, hateten IGEADI, I.P kontinua apoia povu Lacluta hodi normaliza estrada husi suku Uma Tolu to’o postu Lacluta Vila tanba estrada referida iha tempu udan mesak tahu mak nakonu hodi difikulta transporte sira ne’ebé halo viajen bá munisípiu no postu.
“Daudaun ne’e ita-nia ekipa normaliza hela (ateru) estrada ne’ebé aat hanesan kuak no tahu, atu fasilita ita-nia povu parte Lacluta,” Pascoal ba Agência TATOLI, iha postu Viqueque Vila, sábadu ne’e.
Notísia relevante: Projetu reabilitasaun estrada rurál iha Viqueque hamutuk pakote sia
Nia haktuir, estrada referida IGEADI ateru ho rai henek no mós loke bee-dalan atu bee labele estraga estrada.
“Ha’u bele dehan dalan ne’ebé agora IGEADI normaliza hela ne’e la’ós di’akliu, maibé transporte bele liu di’ak uitoan ona kompara ho antes ne’e. Ha’u espera katak aban bainrua ekipa IGEADI kontinua hadi’a to’o postu Lacluta,” Pascoal tenik.
Autoridade Lacluta ne’e hato’o agradesementu ba IGEADI, I.P ne’ebé dezloka mai Lacluta hodi kore povu Lacluta nia preukupasaun ligadu ho estrada.
“Ha’u lori povu Lacluta nia naran hato’o agradesementu ba prezidente IGEADI, I.P no ekipa tékniku sira ne’ebé mai normaliza ami-nia dalan no ponte rua (Sumaku no ponte Welarai) iha postu Lacluta,” nia agradese.
Postu Lacluta kompostu husi suku haat hanesan Uma Tolu, Dilór, Ahic no Laline, ho totál abitante 8.123 no uma-kain 1.907.
Jornalista: Vitorino Lopes da Costa
Editór: Xisto Freitas da Piedade
