iklan

INTERNASIONÁL, HEADLINE, POLÍTIKA

PR Horta partisipa enkontru “Kolaborasaun ba Era Intelijente”

PR Horta partisipa enkontru “Kolaborasaun ba Era Intelijente”

Prezidente Repúblika, José Ramos Horta. Imajen Tatoli/Francisco Sony

DILI, 18 janeiru 2025 (TATOLI)—Prezidente Repúblika (PR), José Ramos Horta, sábadu ne’e, dezloka bá Davos Suisa, hodi partisipa iha Enkontru Anuál Fórum Ekonómiku Mundiál (WEF) ho tema “Kolaborasaun ba Era Intelijente”, husi loron 20-24 janeiru 2025.

Enkontru ne’e nia objetivu atu diskute dezafiu prinsipál globál no rejionál sira, liuliu foka ba impaktu jeopolítiku, estimula kreximentu hodi hadi’a padraun moris nian no jere tranzisaun enerjétika ida-ne’ebé justu no inkluzivu hamutuk ho líder globál sira.

“Ida-ne’e hanesan tema ida-ne’ebé signifikativu ba Timor-Leste haree ba ita-nia populasaun joven ne’ebé sei hakuak no adapta ba teknolojia ne’ebé mudansa ba beibeik inklui mosu Intelijénsia Artifisiál,” Xefe Estadu ko’alia asuntu ne’e iha Aeroportu Internasionál Prezidente Nicolau Lobato, Comoro, Dili, molok aranka ba Suisa.

Iha vizita referida, PR Horta mós sei partisipa iha sesaun altu nível balun ne’ebé foka liubá kooperasaun rejionál, pás no dezenvolvimentu sustentável. Pontu altu maka ninia partisipasaun iha sesaun “ASEAN nia Viajen ba Unidade: Lisaun sira iha Diplomasia no Kolaborasaun Rejionál,” ne’ebé foka ba oinsá ASEAN nia abordajen úniku ba diplomasia no kooperasaun multilaterál haburas unidade iha diversidade nia laran, no mós hamosu dezenvolvimentu sustentável, kreximentu inkluzivu iha hanoin polarizasaun ne’ebé aumenta ba beibeik no tensaun sira entre superpoténsia sira.

Xefe Estadu sei kontribui mós ninia hanoin sira iha sesaun “Navegasaun iha Ázia nia Hotspot sira”, hodi aborda dinámika seguransa rejionál no implikasaun ekonómika sira iha rejiaun Ázia-Pasífika. Sesaun públiku ida-ne’e sei tranzmite direta, ho diskusaun sira kona-ba evita eskalasaun iha mudansa balansu podér no kompleksidade teritoriál sira.

Prezidente Horta nia prezensa iha Enkontru Anuál Fórum Ekonómiku Mundiál ne’e, hetan konvite no nu’udar konvidadu espesiál husi Profesór Klaus Schwab, fundadór no prezidente ezekutivu WEF nian.

Jornalista: Nelson de Sousa

Editór: Xisto Freitas da Piedade

iklan
iklan

Leave a Reply

iklan
error: Content is protected !!