COVALIMA, 20 janeiru 2025 (TATOLI) – Servisu Munisipál Edukasaun Covalima (SMEC), submete ona pedidu hodi husu karteira no meza ba Ministériu Edukasaun nune’e bele distribui ba estabelesimentu ensinu sira ne’ebé menus kadeira no meza iha Covalima.
“Ha’u submete ona pedidu hodi husu kadeira no meza atu distribui ba eskola Eskola Bázika Sentrál 24 maibé pedidu distribuisaun kadeira no meza montante la hanesan tanba eskola balun distribui 100-resin balun la to’o”, Diretora Servisu Edukasaun Munisípiu Covalima, Elda de Fátima dehan, iha Santa Rosa, ohin.
Pedidu ne’ebé Servisu munisipál Edukasaun Covalima submete ba Ministériu Edukasaun (ME) iha loron ikus fulan-dezembru tinan-2024 ne’e maibé to’o ohin loron seidauk iha resposta, tanba prosesu sei halo kadeira no meza.
Aleinde ne’e, submisaun pedidu menus kadeira meza, Edukasaun Covalima mós submete pedidu ba instituisaun ensinu-aprendizajen sira menus livru, nune’e dadaun-ne’e, Ministériu Edukasaun sei prodús livru no hafoin finaliza produsaun, ME distribui ba munisípiu nune’e kontinua halo distribuisaun ba eskola sira.
Tuir dadus eskola EBC iha Covalima hamutuk 24 ho nia filiál 94 ne’ebé eziste iha postu Administrativu sira hanesan Fatululik, Fatumea, Fohorem, Tilomar, Maucatar, Suai no Zumalai.
Manorin iha Covalima mai husi eskola pre-eskolár, Ensinu Báziku Sentrál, Ensinu Sekundáriu no Ensinu Tékniku Vokasionál (TEKVOC) ne’ebé hanorin iha Covalima hamutuk 982; husi númeru ne´e mane 589 no feto 393.
Diretór EBC Foho Bua Bento do Nascimento nia prezensa iha Servisu Edukasaun Covalima ne’e hodi submete pedidu hodi husu ba Edukasaun Covalima atu distribui kadeira no meza ba eskola Foho Bua.
“Ha’u mai iha ne’e entrega proposta ba Diretora Edukasaun Covalima, tanba iha ha’u nia eskola Bázika Sentrál Foho Bua kadeira no meza aat hotu ona nune’e kadeira no meza la to’o ba alunu sira atu tuir prosesu aprendijazen,” nia dehan.
Proposta ne’ebé mak diretór entra ba edukasaun la’os kona-ba kadeira no meza de’it maibé iha eskola EBC Fohobua menus profesór, tanba profesór na’in hitu mak tama iha lista idade reforma obrigatóriu.
Tan ne’e, Eskola presiza profesór foun atu troka pofesór referidu ba disiplina sira hanesan, istória jeografia no siénsia naturál no atu koloka ba eskola filiál Foho lulik dadaun ne’e nia profesór la iha ona.
Jornalista: Celestina Teles
Editór : Rafael Ximenes d A. Belo
