iklan

EDUKASAUN, VIKEKE

ME fó lisensa operasionál ba ESTV-FEHAN hala’o ensinu aprendizajen

ME fó lisensa operasionál ba ESTV-FEHAN hala’o ensinu aprendizajen

VIQUEQUE, 20 janeiru 20 (TATOLI)—Governu liuhusi Ministériu Edukasaun, segunda ne’e, fó liesnsa operasionál ba Eskola Sekundáriu Tékniku Vokasionál (ESTV) Fiar Esperansa Humildade Altarizmu no Nasionalizmu (FEHAN) ne’ebé lokaliza iha Cailoi, suku Bahalara Uain, postu Viqueque Vila, munisípiu Viqueque, hodi hala’o ensinu aprendizajen bazeia ba despaixu ministeriál nú. 54/GM-ME/X1/2024.

Despaixu fó liesan operasionál ba Ensinu Sekundáriu Téniku Vokasionál (SETV/TEKVOK) FEHAN ne’e lansa husi Autoridade munisípiu Viqueque hamutuk ho servisu edukasaun Munisípiu Viqueque.

Reprezenta Prezidente Autoridade Minisípiu Viqueque no atuál Sekretáriu Administrasaun munisípiu Viqueque ba Asuntu Sosiál no Organizasaun, Acacio de Sousa, hateten Governu fó lisensa ba ESTV FEHAN siginfika eskola ne’e hetan ona legalidade husi Ministériu Edukasaun ne’ebé eziste ona iha munisípiu Viqueque.

“Eskola ida-ne’e hetan ona lisensa operasionál husi ME no autoridade munisípiu, nune’e ha’u husu ba komunidade tenke asegura eskola ida-ne’e. Agora legál ona ne’e ita labele husik abandona, siginifika inan-aman tenke haruka oan sira eskola iha ESTV FEHAN,” Acacio Sousa hateten iha serimónia lansa akreditasaun ESTV FEHAN, ohin.

Nia husu ba diretór servisu edukasaun munisípiu Viqueque hodi orienta estudante ensinu báziku sira bainhira ramata estudu bele rejista iha eskola ESTV FEHAN, tanba eskola ne’e loke departamentu rua ne’ebé orienta ema ba kampu servisu.

“Ha’u hato’o agradesementu ba fundadór ESTV FEHAN tanba ho inisiativa di’ak, loke ona eskola tékniku ida-ne’e hodi fó oportunidade ba estudante sira aprende. Tanba, departamentu rua hanesan informatika no agararia bainhira ramata bele buka servisu,” nia dehan.

Reprezentante Servisu Edukasaun Munisípiu Viqueque no atuál Xefe Departamentu Parke Ensinu Eskolár munislípiu Viqueque, Lourenço Soares, haktuir atu hetan lisensa operasionál ne’e liuhusi prosesu naruk.

“Ohin, eskola ESTV FEHAN hetan ona lisensamentu operasionál, ida-ne’e seidauk kompleta hotu. Ita tenke esforau aan nafatin hodi prienxe ba futuru no labele para iha ne’e. Tanba ne’e, eskola la’o di’ak, inan-aman, estudante no profesór tenke kria kooperasaun ida-ne’ebé di’ak.

Diretór ESTV FEHAN, Jamito Gomes, hateten ESTV FEHAN nu’udar eskola privada ne’ebé estabelese iha tinan 2022 ne’ebé hahú simu estudante na’in-50.

“Maske ami hahú la’o prosesu apredizanjen husi zero maibé ami ho kompromisu hasoru dezafiu oioin la’o to’o mai agora. Ami hetan ona lisensa operasionál husi Ministériu Edukasaun (ME). Ami agradese ba inspetór edukasaun no ME ne’ebé fó ona lisensimentu operasionál ba ami,” nia dehan.

Tuir dadús, estudante Eskola ESTV FEHAN departamentu hamutuk rua kompostu husi departentu Informátika no departamentu Agararia ho totál estudante hamutuk na’in-66 no profesór na’in-14.

Totál estudante tuir kada departamentu hanesan departamentu informatika iha estudante klase 1 na’in-20, klase 2 na’in-hitu (7) no klase 3 na’in-24, no departamentu Agraria klase 1 estudante laiha, klase 2 iha estudante na’in-ida (1) no klase 3 iha estudante na’in-14.

Serimónia ne’e partisipa husi autoridade lokál, segundu komadante Polísia Nasionál Timor Leste (PNTL), Veteranu, inan-aman husi estudante eskola ESTV, fundadór ESTV FEHAN, profesór no estudante ESTV FEHAN.

Jornalista : Vitorino Lopes da Costa

Editór      : Cancio Ximenes

iklan
iklan

Leave a Reply

iklan
error: Content is protected !!