COVALIMA, 21 janeiru 2025 (TATOLI) – Institutu Nasionál Seguransa Sosiál (INSS), Covalima seidauk simu orientasaun husi Ministériu Solidariedade Sosiál (MSSI) atu halo pagamentu faze dahaat 2024 ba idozu no invalidez iha Covalima.
“Liga ba pagamentu ba idozu no invalidez faze ba dahaat iha 2024 ne’e informasaun ne’ebé ita iha, daudaun ne’e munisípiu ualu mak halo ona pagamentu,” Koordenadór Deskonsentradu Covalima, Bernardino Sequeira relata dadus ne’e iha nia servisu fatin Suai Loro, ohin.
Nune’e nia dehan bainhira mak atu halo pagamentu ba munisípiu sira seluk ida-ne’e hafoin finaliza pagamentu ba munisípiu ualu foin mak halo pagamentu ba munisípiu seluk ne’ebé seidauk halo pagamentu.
“Kona-ba totál ornamentu pagamentu ba faze dahuluk ha’u la hatene tanba foin assumi koordenadór iha jullu 2024 ne’e, ha’u iha dadus totál orsamentu pagamentu ba faze daruak mak hamutuk $ 1,569.520.00,” nia informa.
Tuir dadus, totál benefisiariu ne’ebé benefisia ba subsídiu idozu no invalidez pagamentu ba faze dahuluk to’o datoluk mai husi postu administrativu hitu hamutuk 7053.
Benefisiáriu idozu no invalidez husi Postu Administrativu Fatululik hamutuk 239, Fatumea 487, Fohorem 579, Maucatar 1068, Suai 2085, Tilomar 821 no Zumalai 1774.
Bazeia oráriu ne’ebé fó sai husi MSSI katak dadaun ne’e hahú halo ona pagamentu ba munisípiu sira hanesan, Baucau, Viqueqeu, Lauren, Manatutu no RAEOA.
Jornalista: Celestina Teles
Editór: Rafael Ximenes de A. Belo
