iklan

MUNISÍPIU, VIKEKE

PAM Viqueque husu EDTL, E.P kontrola eletrisidade mate-lakan

PAM Viqueque husu EDTL, E.P kontrola eletrisidade mate-lakan

Prezidente Autoridade Munisípiu (PAM) Viqueque, Francisco Cruz Simões De Gonzaga Soares. Imajén Tatoli/Vitorino Lopes da Costa

VIQUEQUE, 21 janeiru 2024 (TATOLI)—Prezidente Autoridade munisípiu (PAM) Viqueque, Francisco C.S de Gonzaga Soares, husu dirijente Eletrisidade de Timor Leste, Empreza Públika (EDTL, E.P) atu kontrola másimu ba elerisidade ne’ebé mate-lakan, tanba sei fó impaktu ba abitante sira-nia sasán eletrónika sira.

“Ha’u husu ba dirijente EDTL, E.P nasionál tanba iha munisípiu Viqueque ita enfrenta eleteisidade mate-lakan derrepente hela de’it. Mate derrepente bele estraga ema-nia aparellu sira sai aat hotu. Ita tau Air Condisioner (AC) foun bainhira ahi mate derrepente aat lalais. Tanba ne’e, EDTL, E.P presiza kontrola eletrisidade no halo manutensaun, atu nune’e eletrisidade labele mate-lakan,” PAM Viqueque ne’e hateten ba Agência TATOLI iha nia kna’ar fatin, ohin

Autoridade munisipál ne’e bolu ona servisu EDTL, E.P munisípiu Viqueque hodi rona problema eletrisidsde ne’ebé mate derrepente hodi haree ninia kauza saida mak sempre akontese eletrisidade mate-lakan.

“Parte EDTL, E.P dehan problema ahi mate-lakan ne’e ninia problema Fider tanba iha Viqueque ne’e Fider ida de’it. Nune’e, presiza aumeta Fider atu ahi mate iha fatin ruma, ita bele rezolve. Ahi mate-lakan ne’e ha’u sempre ko’alia beibeik ho EDTL, E.P maibé sira dehan rekursu la to’o. Maibé, ahi lakan komunidade sempre selu tarifa eletrisidade bazeia ba prepagu sira-ne’ebé monta iha kada uma. Nune’e, ha’u hanoin EDTL, E.P tenke serbisu ho profisionál, satán EDTL, E.P nu’udar empreza públika. Sorte iha Timor laiha kompetisaun ne’ebé ema hotu depende ba EDTL de’it, sé iha kompetitór ema bele halai hotu,” nia dehan.

Tanba ne’e, nia husu ba EDTL, E.P tau atensaun ba ahi mate-lakan sira hodi labele estraga komunidade nia sasán tanba ahi mate-lakan fó mós impaktu ba negosiante sira-ne’ebé utiliza jelera no seluk tán.

“Tanba, ahi mate-lakan estraga ema-nia sasán eletróniku sira-ne’ebé ema gastu osan maibé ahi mate-lakan hodi estraga hotu. Ha’u espera, ohin, parte EDTL, E.P bele responde preokupasaun povu no munisípiu nian kona-ba eletrisidade mate-lakan,” nia sujere.

Iha fatin seluk, negosiante Rosito da Costa hateten ahi ne’ebé mate beibeik ne’e fó impaktu ba negosiante sira-nia atividade negósiu, nune’e husu EDTL, E.P halo kontrolu no halo manutensaun tanba kliente selu prepagu maibé ahi mate beibeik.

“Eltrisidade ne’ebé mate-lakan ne’e fó impaktu ba ami nu’udar negosiante sira. Bainhira eletrisidade mate, estraga ami-nia jelera, printer, rede internet mós impaktu hotu. Tanba ne’e, ami husu EDTL, E.P fó atensaun ba eletrisidade, fallansu ne’ebé karik hadi’a, la’ós eletrisidade mate mak foin hakfodak halai ba hadi’a,” nia hateten.

Hatán ba preokupasaun ne’e, Jestór EDTL, E.P Munisípiu Viqueque, Ernesto Sarmento, hateten eletrisidade mate-lakan iha munisípiu Viqueque kauza husi anin no udan, bainhira anin makaas ne’e ai-sanak monu iha liña eletrisidade leten, entaun estraga sasán hanesan fiu-kotu, ai-riin elrisidade tohar ne’e presiza lori tempu hodi hadi’a.

“Kauza seluk mak Isolatór, bainhira isolatór aat ruma difikulta ita identifika ninia avaria tanba ita-nia liña eletrisidade sei operasaun ho manuál, seidauk tama dijitalizaun entaun difikulta ita mós ba ida-ne’e. Maibé, ekipa EDTL, E.P Viqueque sei kontinua asegura eletrisidade,” nia dehan.

Akontesimentu eletrisidade mate-lakan la’ós iha munisípiu Viqueque de’it maibé kuaze munisípiu sira iha territóriu ne’e hotu-hotu eletrisidade mate-lakan, maibé la’ós ahi mate permanente.

Tékniku servisu EDTL, E.P munisípiu Viqueque hamutuk na’in-38 ne’ebé koloka ba postu administrativu lima mak postu administrativu Ossú, Lacluta, Uatulari, Viqueque Vila no Uatucarbau.

Jornalista : Vitorino Lopes da Costa

Editór        : Cancio Ximenes

iklan
iklan

Leave a Reply

iklan
error: Content is protected !!