PR ho líder organizasaun sudeste-aziátiku diskute viajen ASEAN nian ba unidade

SUIÇA, 21 janeiru 2025 (TATOLI) – Prezidente repúblika, José Ramos Horta ho líder organizasaun sudeste-aziátiku diskute asuntu ho tema “Viajen ASEAN nian ba unidade: lisaun diplomasia no kolaborasaun rejionál” hodi fó espasu ba diskusaun sira hodi hasa´e unidade no kooperasaun entre nasaun sudeste-aziátiku, iha enkontru no almosu konfraternizasaun, iha Salaun Sentru Konvensaun Fórum Ekonómiku Mundiál, Davos, Suiça, tersa ne´e.
Enkontru ne´e mós hakle´an solidaridade rejionál no kolaborasaun sira hodi rezolve dezafiu ne´ebe nasaun sira iha ASEAN enfrenta.

Enkontru ne´ebé hetan partisipasaun husi Xefe Estadu Timor-Leste ne´e mós hodi hatuur Timor-Leste iha mapa ASEAN nian, hodi hametin relasaun Timor ho nasaun ASEAN sira seluk.

Entretantu, eventu ne´e hetan partisipasaun husi reprezentante husi estadu membru ASEAN sira, ho partisipasaun espesiál husi Julie Bishop nu´udar reprezentante ONU iha Myanmar ho ninia prezensa hatudu envolvimentu internasionál hodi apoia ba asuntu sudeste-aziátiku liuliu dezenvolvimentu Myanmar no estabilidade rejionál.

Jornalista: Jogerjo Guterres
Editór: Rafael Ximenes de A. Belo