VIQUEQUE, 21 janeiru 2025 (TATOLI)-Diretór Servisu Ministériu Agrikultura Pekuária, Peska no Floresta (SMAPPF) munisípiu Viqueque, Olivio Soares Freitas, informa SMAPPF Viqueque daudaun ne’e menus rekursu tékniku extensionista ne’ebé koloka ba kada suku sira hodi fó asisténsia téknika ba agrikultór sira.
“Daudaun ne’e, ami-nia extensionista hamutuk na’in-23 de’it. Loloos ne’e, tenke na’in-36 tanba koloka kada suku ema ida. Maibé, númeru extensionista la sufisente, entaun iha suku balun laiha tékniku extensionista,” Olivio Soares Freitas hateten ba Agência Tatoli iha nia kna’ar fatin, Beloi, ohin.
Tanba ne’e, nia dehan, lolos tinan ida-ne’e halo rekrutamentu ba extensionista maibé orsamentu la sufisiente hodi halo rekrutamentu tékniku extensionista sira hodi koloka ba suku ne’ebé laiha pesoál extensionista.
“Tuir lolos ne’e, iha tinan ne’e (2025), ami halo rekrutamentu ba extensionista foun sira maibé orsamentu ne’ebé minisípiu aloka ba ami ne’e $504,000.00. Entaun, ami haree orsamentu la sufisiente hodi halo rekrutamentu ba extensionista tanba osan lato’o. Ita mós iha atividade agrikultura, dalaruma ami rekruta extensionista ema na’in-rua (2) maibé ami sei tetu osan ne’ebé agora koloka ba ami,” nia dehan.
Tuir nia, iha tinan oin (2026), SMAPPF Viqueque sei tau ba planu orsamentu hodi halo rekrutamentu ba extensionista sira atu destaka ba suku sira-ne’ebé seidauk iha tékniku extensionista.
“Tanba, númeru extensionista ne’ebé limitadu difikulta ba ami tanba iha suku balun laiha extensionista. Ami ho maneira vizita suku ne’ebé laiha extensionista, tanba extensionista ne’e nia servisu mak fó asistensia tékniku sira hanesan oinsá halo toos, natar no haki’ak animál nian ba ita-nia agrikultór sira iha suku,” nia hateten.
Tuir dadus, extensionista ne’ebé iha SMAPPF Viqueque koloka ba kada postu hanesan postu Lacluta ema na’in-rua (2), Ossú na’in-lima (5), Viqueque Vila na’in-hitu (7), Uatulari na’in-lima (5) no postu Uatucarbau na’in-haat (4).
Jornalista : Vitorino Lopes da Costa
Editór : Cancio Ximenes
