iklan

HEADLINE, SAÚDE

2024, HNGV hatama reseita $447.978,77 ba kofre Estadu

2024, HNGV hatama reseita $447.978,77 ba kofre Estadu

Diretora Administrasaun Finansa no Lojístika HNGV, Sara Maria Xavier. Imajen Tatoli/Francisco Sony

DILI, 22 janeiru 2025 (TATOLI)—Durante tinan 2024, Hospital Nacional Guido Valadares (HNGV) hatama reseita ho montante $447.978,77 ba kofre Estadu.

“Durante tinan 2024, ita hatama ona reseita ba kofre Estadu hamutuk $447.978,77,” Diretora Administrasaun Finansa no Lojístika HNGV, Sara Maria Xavier, hateten ba jornalista sira iha HNGV, Bidau, kuarta ne’e.

Nia informa, reseita ne’ebé mak HNGV rekolla maihusi ema estranjeiru ne’ebé halo tratamentu saúde no mós pasiente nasionál sira.

“Reseita ne’e maihusi ema estranjeiru sira ne’ebé mai halo tratamentu saúde iha HNGV inklui pasiente nasionál sira ne’ebé baixa iha sala VIP,” nia esplika.

Nia deklara, timoroan no estranjeiru  ne’ebé mai medical check up no hetan tratamentu vasinasaun amarelu ne’ebé mak sira atu aloka bá estranjeiru, ida-ne’e sira selu.

“Ba pasiente estranjeiru bainhira sira partu sezariana ne’e, nia taxa mak $200, depois inklui mós ai-moruk. Ezemplu, soru no ai-moruk ida-ne’e durante sira selu. Más, ita-nia sistema ba sidadaun Timor la selu. Só selu bainhira baixa iha VIP. Sidadaun Timor ne’ebé mak hetan vasinasaun amarelu atu dezloka bá estranjeiru, ida-ne’e mak selu, inklui mós bainhira sira halo medical check up hanesan hasai atestadu médiku ka hasai karta kondusaun ne’e selu, ka hetan sertifikadu husi medical check up nian inklui bá eskola ruma, ida-ne’e selu,” nia konklui.

Tuir Dekretu-Lei ne’ebé aprovadu kona-ba Estatutu Hospital Nacional Guido Valadares (HNGV) iha reuniaun Konsellu Ministru, iha 21 setembru 2015, Governu rekoñese HNGV nu’udár organizmu administrasaun indireta husi Estadu, ne’ebé goza nia autonomia administrativa, finanseira no patrimoniál. Iha diploma ne’ebé aprova estatutu HNGV ne’e, koloka mós kompeténsia, norma funsionamentu no servisu.

Jornalista: Felicidade Ximenes

Editór: Xisto Freitas da Piedade

 

iklan
iklan

Leave a Reply

iklan
error: Content is protected !!