BAUCAU, 22 janeiru 2025 (TATOLI)—Diretór Ezekutivu Ospitál Rejionál Eduardo Ximenes Baucau, Claudino Ximenes, klarifika pasiente ho inisiál JF ne’ebé mate tanba pneumonia.
“Pasiente ne’e transporta hosi uma iha loron-18 janeiru ho kondisaun grave. Antes pasiente hakotu iis, kondisaun hahú iha mudansa maibé dadeersan família sira fó han, deskonfia hahán nisik ka pneumonia hodi halo atakasaun to’o rezulta pasiente lakon vida, mezmuke médiku sira halo ona esforsu”, Diretór ne’e ba TATOLI iha ninia kna’ar fatin, Vila Nova, Baucau, kuarta ne’e.
Pneumonia ne’e atake ema bainhira kondisaun pulmaun afetada inflamasaun tanba hahán no bee tama liuhosi kanál iis, nune’e halo pasiente susar dada iis tanba intupidu no afeta ba menus oksijéniu.
Nia haktuir matebian mos sofre tensaun alta, hipoteroid no filariose. Nia hatutan tan, ai-moruk levothyroxine ne’ebé pasiente presiza estoke laiha. Tanba ne’e, médiku rekomenda ba família sosa no tuir planu sei utiliza iha semana oin tanba presiza halo ezaminasaun.
“Atu klarifika katak ai-moruk ne’ebé mensiona ne’e la’ós atu utiliza kedas maibé sei liuhosi ezaminasaun mak foin fó”, nia esklarese.
Claudino haktuir ai-moruk ho tipu ida-ne’e só eziste iha armazein Institutu Nasionál Farmaseútiku no Produtu Médiku (INFPM) no bainhira presiza mak foin distribui bá ospitál sira.
Família matebian, Joaquim do Rosário Freitas, hateten bainhira simu reseita hosi médiku sira atu sosa ai-moruk ho naran Levothyroxine, nia parte esforsu buka iha Baukau maibé laiha, nune’e kontinua bá Dili no konsege hetan tableta ida musan sanulu ho folin $5.
“Ha’u bá sosa iha Dili fila kedas, maibé tuir dalan simu telefone rona dehan ha’u-nia bin laiha tiha ona,” Joaquim informa ba TATOLI liuhosi telefone.
Joaquim konfesa bainhira médiku sira fó reseita, nia parte husu konfirmasaun kona-ba ai-moruk referida no médiku sira esplika ba nia katak ai-moruk ne’e presiza urjenti tenke konsumi tanba bele ajuda moras ne’ebé pasiente sofre.
“Sira dehan ai-moruk ne’e presiza loos atu konsumi. Ida-ne’e mak ha’u foin bá hola ne’e,” nia tenik.
Pasiente JF nu’udar fén kaben hosi LF, ho oan na’in ualu, mane haat no feto haat hosi aldeia Maukale, suku Gariuai, Postu administrativu Baukau Vila.
Kazu ne’e virál iha mídia sosiál katak pasiente ne’e mate tanba menus ai-moruk.
Jornalista : Natalino Belo
Editór : Xisto Freitas da Piedade