COVALIMA, 22 janeiru 2025 (TATOLI) –Administradór Postu administrativu Zumalai Alípio Magno, preokupa ho eletrisidade iha Postu administrativu Zumalai, munisípiu Covalima ne´ebé kontinua lakan -mate, hahú iha dezembru 2024 to´o ohin loron, iha postu administrativu ne´e.
“Durante ne’e, ha’u hanesan autoridade postu preokupa tanba molok tama tinan foun, bainhira hahú padre Tanizio simu ordenasaun to’o ohin loron, eletrisidade sempre mate hela de’it nune´e halo komunidade mós preokupa,” Administradór Alípio Magno informa iha suku Fatuleto, ohin.
Autoridade ne´e dehan, Eletrisidade mate fó impaktu ba komunidade sira-nia sasan eletróniku hanesan jelera, televizaun no fó impaktu mós ba komunidade sira ne’ebé loke loja – sosis no produtu konjeladu sira seluk hetan estragu.
Ho problema referidu, hanesan Autoridade postu halo kontaktu ba xefe EDTL, E.P Covalima hodi konfirma razaun eletrisidade mate, xefe Unidade EDTL E.P Covalima nia responde katak sei haree parte ne’ebé mak aat. Hafoin ko’alia hotu, eletrisidade kontinua mate kedas.
Autoridade postu ne’e dehan, nia parte lahatene problema ne´ebé kauza eletrisidade mate, maibé tékniku EDTL,E.P Covalima mak hatene razaun saida mak eletrisidade iha Zumalai sempre lakan-mate.
“Ha’u nafatin hato’o ba Eletrsidade Timor-Leste, Empreza Públika, Munisípiu Covalima nune’e sira bele halo esplikasaun problema eletrisidade mate ba ami autoridade no ami mós kontinua hatutan informasaun ba komunidade sira,” nia dehan.
Monta LBS
Xefe Unidade EDTL, E.P Covalima, Anorito Mendonça klarifika, eletrisidade mate, tanba daudaun nia parte hamutuk ho tékniku sira iha terreñu iha área Suku Beco Aldeia Zoak postu Suai hodi hadi´a eletrisidade.
“Daudaun ne’e ami hamate eletrisidade tanba ha’u ho tékniku sira iha terrenu hodi hadi´a hela eletrisidade atu monta Load Break Switch (LBS) hafoin mak eletrisidade bele lakan normál fali,” nia esplika.
Entretantu, LBS maka dispozitivu ida-ne’ebé desliga korrente elétriku hosi dispozitivu elétriku ka sirkuitu bainhira korrente liu valór nominál.
LBS dezeña atu hakotu enerjia “lakan ka mate” ka muda pozisaun bainhira transformadór hetan enerjia (signifika katak nia iha karga)—switch sei hakotu karga ida-ne’e.
Jornalista: Celestina Teles
Editór :Rafael Ximenes de A. Belo
