iklan

BAUKAU, HEADLINE, MUNISÍPIU, SEGURANSA

Membru Komponente Terrestre F-FDTL realiza doasaun ran iha HoREX Baucau

Membru Komponente Terrestre F-FDTL realiza doasaun ran iha HoREX Baucau

Membru F-FDTL halo doasaun ran hodi selebra loron transformasaun FALINTIL ba FDTL ba dala-XXV, iha HoREX Baucau, kuarta (22/01/2025). Imajen TATOLI/Natalino Belo

BAUCAU, 22 janeiru 2025 (TATOLI)—Membru FALINTIL-Forsa Defeza Timor-Leste (F-FDTL) husi Komponente Terrestre, kuarta ne’e, halo doasaun ran iha Ospitál Rejionál Eduardo Ximenes (HoREX, sigla portugés) Baucau.

Diretór Ezekutivu HoREX Baucau, Claudino Ximenes, hato’o agradesementu ba Komponente Terrestre F-FDTL ne’ebé durante tinan barak sai parseiru ho HoREX Baucau hanesan realiza atividade konsulta jerál no doasaun ran.

“Ami agradese tanba ami-nia parseiru permanente, la’ós tanba ohin de’it maibé bainhira pasiente sira presiza ran, ami sempre husu ajuda membru F-FDTL hodi halo doasaun,” diretór ne’e ba TATOLI iha ninia kna’ar fatin, Vila Nova, Baucau.

Atividade doasaun ran ne’e, nia esplika, parte ida mós hosi Komemora Loron Transformasaun F-FDTL ba dala-XXV.

Nia dehan atividade doasaun ran ne’e realiza durante loron rua, hahú ohin no sei ramata iha aban, kinta (23/01/2025), iha-ne’ebé loron dahuluk envolve membru hamutuk na’in-25.

Entretantu, FALINTIL nu’udár forsa armada ne’ebé hala’o misaun gerilla hodi liberta Timor-Leste hosi invazaun Indonézia durante tinan 24. Nune’e, bainhira Timor-Leste hetan independénsia iha tinan 1999, FALINTIL hahú transforma nia an ba F-FDTL iha loron 02 fevereiru 2000, parte mudansa husi forsa konvensionál ba modernu hodi hala’o misaun defeza ba soberania Timor-Leste.

Jornalista: Natalino Belo 

Editór: Xisto Freitas da Piedade 

iklan
iklan

Leave a Reply

iklan
error: Content is protected !!