PAM Covalima observa direta empreza Tofranditar normaliza estrada Bee-mean Zumalai
COVALIMA, 22 janeiru 2025 (TATOLI) – Prezidente Autoridade Munisípiu Covalima, Miguel Armada Cardoso akompaña hosi diretór servisu munisipál sira observa direta empreza Tofranditar normaliza estrada Bee-mean, iha Suku Fatuleto, Aldeia Biata, Postu administrativu Zumalai, Munisípiu Covalima.
“Ha’u hato’o agradese ba empreza lokál Tofranditar Unipesoal Lda, iha inisiativa organiza komunidade halo normalizasaun estrada Bee-mean maske normaliza ladun di’ak liu maibé bele fasilita movimentu transporte públiku,” Miguel Armada Cardoso, dehan iha suku Fatuleto, ohin.
Ho nune’e, autoridade munisípiu tau iha planu, haree ba kondisaun estrada bee mean grave tebes. Tanba Estrada bee-mean konstrui iha 2020 husi empreza Roman Junior hodi gasta osan milliaun $3-resin ne’ebé finaliza ona. Maibé, iha 2024 tanba haree kondisaun rai, estrada aat fali.
Tan ne’e liuhusi planu servisu hamutuk obra públika munisipál, autoridade lokál líder komunitária sira halo ona levantamentu hodi hato’o ona ba Ministériu Obra Públika atu haree ho sériu.
“Provizóriu atu responde problema ba ida-ne’e ami presiza kria reuniaun, organiza husi administradór postu Zumalai atu identifika ita-nia empreza lokál hodi ajuda maske sira iha ona inisiativa normaliza ona estrada bee mean maibé daudaun ne’e presiza atu normaliza aterru rai-henek hodi fasilita movimentu transporte públiku,” nia dehan.
Jestór projetu Empreza Tofranditár Unipesoal Lda, Anito Jeronimo, Empreza iha iniativa hamutuk ho komunidade sira normaliza estrada bee-mean, tanba durante ne’e estrada bee-mean difikulta komunidade sira atu halo movimentu.
“Empreza ho komunidade sira ne’ebé mak iha transporte organiza malu normaliza estrada tanba difisil atu halo movimentu uza transporte públiku no difisil ba ami atu transporta materiál konstrusaun bainhira empreza lokál sira kaer projetu atu halo dezenvolvimentu iha suku,” nia dehan.
Durante ne’e komunidade husi Fatuleto, Aldeia Biata mak ajuda hodi hulan motoriza ba mai tan ne’e empreza iha hanoin hamutuk ho komunidade sira normaliza haree kondisaun estrada bee-mean grave hodi fasilita movimentu transporte públiku.
Abitante Suku Lepo Jorge de Araújo reforsa, abitante hamutuk ho empreza mai atu halo normaliza estrada nune’e bele fasilita komunidade halo movimentu lori nia produtu lokál fa´an iha merkadu.
“Ami ho empreza mak organiza malu hodi mai normaliza estrada bee-mean tanba durante tinan rua resin ona difísil atu halo movimentu transporte públiku hodi lori ami-nia produtu lokál atu fa´an iha merkadu,” nia rekomenda
Ho kondisaun Estrada difikulda komunidade husi Suku Lepo, Mape no Fatuleto tanba estrada bee-mean, estrada protokolu hodi liga komunidade husi Covalima ba Bobonaro, Manufahi no Ainaro maibé to’o ohin loron Governu seidauk fó atensaun.
Molok ne’e, iha loron 14 abríl 2023 Eis-Ministru Obra Públika Abel Pires da Silva halo ona observasaun direta ba kondisaun estrada no orienta kedas ba tékniku Diresaun Jerál, Estrada, Ponte, Prevensaun, Kontrollu no Seia hamutuk kompaña Aitula Fuel, Unipesoal Lda, atu mobiliza ekipamentu hodi halo normalizasaun estrada nune’e bele fasilita movimentu transporte públiku no privadu liga husi munisípiu Covalima ba munisípiu Bononaro.
Jornalista: Celestina Teles
Editór :Rafael Ximenes de A. Belo
