SUIÇA, 22 janeiru 2025 TATOLI – Prezidente Repúblika (PR), José Ramos Horta hala´o enkontru bilaterál ho Sekretáriu jerál (SEKJER) Asosiasaun Nasaun Sudeste Aziátiku (ASEAN), Kim Hourn, aborda progresu ne’ebé Timor-Leste (TL) halo hodi kumpri roteiru ba adezaun ba ASEAN no pasu estratéjiku sira tuirmai hodi konsolida integrasaun tomak, iha Sentru Kongresu Davos, entre tuku 10 no to’o tuku 10:30 dadeer.
Enkontru bilaterál ne´e refleta importánsia TL nian ne’ebé buras iha rejiaun no avansu sira iha nia prosesu membru tomak ba organizasaun sudezte-aziátiku ne´e.
Diskuti mós kona-ba tema sira relasiona ho kooperasaun rejionál, prezensa diplomátika iha rai-laran no aliñamentu kalendáriu husi adezaun ho prosesu internu Timor-Leste no ASEAN nian.
Molok hahú enkontru bilaterál, bele hala’o enkontru tripartida badak ida, ho objetivu kumprimentu, entre Prezidente timoroan, Sekretáriu Jerál ASEAN no Paulo Rangel, Ministru Estadu no Negósiu Estranjeiru Portugal nian, destaka interrese mútua iha haburas relasaun estratéjiku sira iha Sudeste Aziátiku no nasaun sira ne’ebé ko’alia lian Komunidade Portugés (CPLP, sigla portugés).
Entretantu, enkontru bilaterál ne´e hetan akompañamentu mós husi Vise-Ministra Asuntu ASEAN, Milena Rangel ho objetivu husi atu diskute kona-ba adezaun tomak Timor-Leste nian ba ASEAN no Komunidade ASEAN 2045.
Jornalista: Jogerjo Guterres
Editór: Rafael Ximenes de A. Belo
