iklan

MUNISÍPIU

APC Viqueque rejista dezastre naturál 195 iha 2024

APC Viqueque rejista dezastre naturál 195 iha 2024

Komadante Autoridade Protesaun Sivil (APC, sigla portugés) munisípiu Viqueque, Cirilio Soares Gomes. Imajén Tatoli/Vitorino Lopes da Costa.

VIQUEQUE, 23 janeiru 2025 (TATOLI)—Hahú husi janeiru to’o dezembru 2024 ne’e, Autoridade Protesaun Sivil (APC, sigla portugés) munisípiu Viqueque rejista dezastre naturál hamutuk 195.

“Akontesementu dezastre naturál ne’ebé akontese iha munisípiu Viqueque ba tinan 2024 ami rejista kazu hamutuk 195. Husi númeru ne’e hetan hotu ona pakote apoia emerjénsia liuliu ba  nesesidade bázika ba ita-nia vítima afetadu dezastre naturál sira iha munisípiu Viqueque,” Komandante Autoridade Protesaun Sivil (APC, sigla portugés) munisípiu Viqueque, Cirilio Soares Gomes, hateten ba Agência TATOLI iha nia knaar fatin, Sira Lari, ohin.

Husi dezastre naturál ne’ebé akontese ne’e fahe ba tipu dezastre sira hanesan anin-boot, rai-halai, ahi han uma (insénsiu), bee sa’e komunidade nia uma (lalubur ka inundasaun).

“Husi númeru ne’e, ami kategória iha uma ne’ebé hetan estragu totál hamutuk una kain 161 mak merese atu simu materiál rekuperasaun. Enkuantu, uma-kain 34 la merese simu materiál rekuperasaun tanba ita konsidera hanesan dapur oan sira mak hetan estragu. Tan ne’e, mak sira labele simu materiál ba rekuperasaun maibé ba apoia emerjénsia sira hetan ona.

Kona-ba apoia rekuperasaun, nia dehan, daudaun ne’e APC seidauk apoiu ba vítima sira tanba sei prosesa hela iha nasionál.

“Materiál rekuperasaun ita entrega ona ba nasionál hodi hein halo aprovasaun, dala ruma materiál rekuperasaun bele fó apoia iha tinan 2025, depende iha nasionál,” nia dehan.

Nune’e mós, nia relata, iha tinan 2024 ne’e, APC rejista ema mate tanba dezastre naturál hamutuk na’in-lima (5).

Iha inisíu fulan-janeiru tinan 2025 ne’e akontese udan-boot, APC Viqueque rejista dezastre naturál ida mak mota lori labarik kiik ida.

Jornalista : Vitorino Lopes da Costa

Editór        : Cancio Ximenes

iklan
iklan

Leave a Reply

iklan
error: Content is protected !!