iklan

DEFEZA, HEADLINE

Austrália apoia botas militár 1000 ba F-FDTL

Austrália apoia botas militár 1000 ba F-FDTL

Adidu Defeza Austrália, Kapitaun Mar e Guerra Mathew Richardson, simbolikamente entrega botas militár ba Xefe Estadu Maiór Jenerál Forsa Defeza Timor-Leste, Tenente Jenerál Domingos Raul “Falur Rate Laek”, iha Sentru Instrusaun Prezidente Nicolau Lobato, Metinaro, Dili, kinta (23/01/2025). Foto TATOLI/ Natalino Costa.

DILI, 23 janeiru 2025 (TATOLI)—Forsa Defeza Austrália apoia botas militár ba FALINTIL-Forsa Defeza Timor-Leste (F-FDTL) atu uza ba serbisu militár.

Xefe Estadu Maiór Jenerál FALINTIL-Forsa Timor-Leste, Tenente Jenerál Domingos Raul “Falur Rate Laek”, hato’o agradesementu ba apoiu ne’ebé Austrália fó ba Forsa Defeza Timor-Leste.

“Ohin ita mai iha-ne’e, asiste momentu istóriku liuhusi programa apoiu ne’ebé forsa Austrália entrega mai ita. Ohin ita simu tan botas husi ita-nia parseiru Austrália. Botas sira-ne’e serve duni ba sira (membru F-FDTL ) atu uza. Apoiu ida-ne’e iha signifikadu boot entre Timor-Leste ho Austrália nia relasaun, iha-ne’ebé atu hametin relasaun entre nasaun rua,” Falur hateten liuhusi nia intervensaun iha ámbitu seremónia entrega botas, iha Sentru Instrusaun Komandante Nicolau Lobato (CICLN, sigla portugés), Metinaro, Dili, kinta ne’e.

Tenente Jenerál ne’e informa katak Austrália nu’udár parseria estratéjika ida ba Timor-Leste, tan ne’e husu Austrália kontinua apoia F-FDTL nune’e hamutuk kombate ameasa sira.

Notísia relevante: Timor-Leste no Austrália sei selebra akordu kooperasaun dezenvolvimentu Forsa Armada

“Imi presiza kontinua halo kooperasaun militár iha Timor-Leste atu prevene ameasa sira. Hanesan nasaun viziñu tenke apoia malu nafatin hodi prevene ameasa sira,” nia adianta.

“Austrália nu’udár parseiru estratéjiku ba Timor-Leste. Ita lahaluha Austrália nia apoiu durante ne’e fó ba ita. Durante dezenvolvimentu forsa defeza hahú husi Aileu mai Metinaro to’o ohin loron sira sempre akompaña ita-nia dezenvolvimentu forsa nian,” nia haktuir tan.

Falur mós lahaluha nasaun parseiru sira hanesan Japaun, Portugál no Koreia ne’ebé mak durante ne’e apoia maka’as F-FDTL liuhusi treinamentu hodi dezenvolve F-FDTL sai forsa ne’ebé profisionál.

Iha fatin hanesan, adidu defeza Austrália, Kapitaun Mar e Guerra Matthew Richardson, hateten onra boot ba nia reprezenta Governu Austrália hodi entrega botas ba Forsa Armada Timor-Leste.

“Ohin ita mai iha Sentru Instrusaun Metinaro hodi entrega apoia ne’ebé forsa armada Austrália fó ba Forsa Defeza Timor-Leste,” nia afirma.

Nia akresenta, botas ne’ebé Austrália apoia ne’e nu’udár botas ho kualidade di’ak tebes ne’ebé forsa Austrália mane no feto uza ba serbisu no ezersísiu.

“Austrália kompromete sei apoia nafatin Timor-Leste iha kualker setór liuliu ba mós Forsa Armada Timor-Leste nian atubele dezenvolve di’ak liután,” nia konklui.

Jornalista: Natalino Costa

Editór: Xisto Freitas da Piedade

iklan
iklan

Leave a Reply

iklan
error: Content is protected !!