CAC sensibiliza lei medida prevensaun-kombate korrupsaun ba kargu xefia sira

DILI, 23 janeiru 2025 (TATOLI)–Komisaun Antí Korrupsaun (CAC-sigla portugés), kinta ne’e, hala’o sensibilizasaun ba kargu xefia no asesór nasionál kada ministériu durante loron ida kona-ba Lei Nú.7/2020, 26 agostu, ne’ebé ko’alia kona-ba medida prevensaun no kombate korrupsaun, iha salaun Ministeriu Solidaridade Sosiál no Inkluzaun (MSSI) Caicoli.
Notísia Relevante: Lei MPCC obriga jestór setór públiku-privada ezekuta OJE ho fuan moos
“CAC halo sensibilizasaun ba kargu xefia sira, asesor nasionál sira kada ministeriu kona-ba servisu CAC nian, atu nune’e informasaun sira bele habelar ba ministeriu ida-idak, oinsa sira bele rezista sira-nia riku-soin, ida-ne’e mak servisu ohin loron nian,” Komisariu CAC, Rui dos Santos Pereira, hateten ba jornalista sira hafoin hala’o sensibilizasaun ba kargu xefia sira.
Nia dehan, sensibilizasaun ne’e hala’o tanba kargu xefia sira-ne’e barak mak ladún komprende kona-ba lei medida prevensaun no kombate korrupsaun ne’e.
“Ita ladún halo sebsibilizasaun mak iha tinan kotuk, iha Ministériu barak mak sira-nia kargu xefia no asesor nasionál balun kona penalidade no sira-ne’e maioria iha Ministériu Interior (MI), balu iha Ministériu Saúde (MS) no Ministériu balun tan. Sira kona penalidade ne’e hamutuk 400-resin tanba la deklara sira-nia rikusoin. Husi númeru ne’ebé iha, balun konsege halo reklamasaun ita konsidera no balun ita la konsidera,” nia hateten.
Ho sensibilizasaun ne’ebé daudaun ne’e CAC halo ne’e, bele tulun ministériu sira atu aprezenta lista kargu xefia no asesor nasionál sira ba CAC.
“Fiar katak Ministeriu ida-idak inklui Parlamentu Nasionál sira tenke aprejenta sira nia lista tanba lei ne’e ko’alia mo-mós katak se mak hatene aan kargu xefia no assesor nasionál tenke ba rezista riku-soin,” nia hateten.
Lei Medida Prevensaun no Kombate Korrupsaun (MPCC, sigla portugés) ho artigu hamutuk 117, tama ein vigór no kompleta ona loron 180, iha loron 22 fevereiru 2021, mak ekipa husi CAC hahú halo diseminasaun ba ajente públiku liuliu kargu xefia sira.
Lei MPCC iha artigu 29 to’o 30 ne’e fó obrigatóriu ba iha ajente públiku sira-ne’ebé kaer hela kargu polítiku no kargu xefia iha funsaun públika iha instituisaun Estadu, diretór nasionál to’o mai xefe departamentu iha obrigasaun atu bele aprezenta sira-nia deklarasaun bens no interrese.
Funsionáriu Estadu ne’ebé asume kargu xefia sei deklara sira-nia rikusoin inklui sira-nia família ba CAC bainhira lei ne’e hahú implementa.
Iha kapítulu II Rejime Deklarasaun Bens no Interese, artigu 28 obriga kualkér sidadaun ne’ebé asume karu públiku tenke deklara rikusoin.
Natureza husi artigu ne’e ko’alia kona-ba ema sira-ne’ebé atu halo deklarasaun, hanesan sira ne’e asume kargu polítika, deskrisaun ne’e mai to’o xefe departamentu no funsionáriu sira ne’ebé la’ós okupa kargu xefia maibé pertense ba área sira konsidera altu risku ba korrupsaun.
Nune’e mós, ba funsionáriu sira-ne’ebé iha área serbisu hanesan impostu, aprovizionamentu ba kontratu públiku, jestaun rai ho inspesaun tenke halo deklarasaun.
Notísia Relevante: PN-Governu presiza serbisu hamutuk apoia CAC implementa lei MPCC
Jornalista : Hortencio Sanchez
Editór : Cancio Ximenes

