Falur observa progresu konstrusaun edifísiu sala memoriál luta libertasaun nasionál

DILI, 23 janeiru 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”  akompañadu husi Adidu Defeza Austrália, Kapitaun Mar e Guerra Matthew Richardson no Komandante Sentru Instrusaun Prezidente Nicolau Lobato, observa edifísiu Sala Memoriál Luta Libertasaun Nasionál ne’ebé konstrui husi forsa defeza Austrália.

Edifísiu Sala Memoriál Luta Libertasaun Nasionál ne’e nu’udár doasaun husi Governu Austrália oferese ba Timor-Leste.

Konstrusaun edifísiu sala memoriál ne’e hala’o iha Sentru Instrusaun Prezidente Nicolau Lobato, Metinaro. Sala memoriál referida ne’e hahú konstrui iha tinan kotuk no agora konklui ona 100% no hein de’it atu entrega ba Governu Timor-Leste. Sala memoriál ne’e kompostu husi kuarta haat no sala vizita ida. Kada kuartu sei prezerva memória ba istória luta Timor-Leste nian ba libertasaun nasionál.

Xefe Estadu Maiór Jenerál FALINTIL-Forsa Defeza Timor-Leste (F-FDTL), Falur Rate Laek, hateten Memoriál ne’e hanesan sentru ida memoriza istória, identidade no integridade nasionál.

Nia hatutan, sentru ida-ne’e nu’udár sentru reflesaun ida ba líder militár sira kuandu atu bá tuir formasaun akadémika mai uluk fatin ne’e para halo reflesaun antes asumi misaun ruma ka antes hola pozisaun ruma.

“Ita tama bá forsa tenke liu tiha fatin memoriál  halo reflesaun mak bá tama militár tanba atu tama militár ne’e atu defende sira ne’ebé mate ona nia mehi,” Falur dehan iha Metinaro, kinta ne’e.

Nia esklarese, kuartu sira iha sala memoriál sei rai patrimóniu kulturál istória Timor-Leste nian, ba luta libertasaun nasionál.

“Kuartu ida afirma identidade foho Paitchau atu dignifika rai ne’e nian ulun. Segundu, sei rai patrimóniu kulturál foho Matebian nian ne’ebé hanaran Waibitai, depois  kuartu ida sei tau identidade kulturál foho iha parte sentru ne’ebé naran Toi-Asu Tatamou, depois iha kuartu ida ita sei tau identidade kulturál foho parte fronteira nian ho naran Bere-Meta para reprezenta  no dignifika,” nia esplika.

Nia tenik, tuir planu, edifísiu sala memoriál luta libertasaun nasionál sei inaugura iha ámbitu selebrasaun loron FALINTIL ba dala 50 ne’ebé sei hala’o iha agostu tinan ne’e.

Jornalista: Natalino Costa

Editór: Xisto Freitas da Piedade