Komisaun F identifika koziña HNGV seidauk iha separasaun ba hahán
DILI, 23 janeiru 2025 (TATOLI)—Komisaun F ne’ebé trata asuntu seguransa, sosiál no igualidade jéneru, halo fiskalizasaun ba Hospital Nacional Guido Valadares (HNGV), identifika koziña ne’ebé mak te’in hahán ba pasiente seidauk iha separasaun di’ak.
“Ohin ami halo fiskalizasaun ba koziña iha HNGV hodi haree direta katak aruma (rai) hahán liuliu ba modo no naan sira ne’ebé mak empreza prepara ladún iha separasaun, tanba ikan ho naan karau no naan manu tau hamutuk de’it. Entaun, ida-ne’e, bele iha kontaminasaun naan ida ho naan seluk, satán naan karau rai hamutuk ho ikan bele kontamina hodi fó impaktu ba pasiente sira-nia saúde,” Prezidente Komisaun F Parlamentu Nasionál, Maria Gorumali Barreto ba jornalista sira iha HNGV, Bidau, kinta ne’e.
Nia haktuir, koziña HNGV ne’e rasik Komisaun F deteta mós materiál plástiku ne’ebé mak tau modo-been hodi oferese ba pasiente, rekomenda ba empreza bá oin lalika utiliza plástiku atu tau modo-been.
“Ami mós deteta iha koziña HNGV katak materiál plástiku ne’ebé mak tau modo-been hodi oferese ba pasiente sira, ida-ne’e ami ohin rekomenda kedas katak bá oin labele uza plástiku bainhira tau modo-been sira-ne’e, tanba bele kontamina fo’er sira. Se bele uza kaixa masa ki’ik ne’ebé mak iha matan, nune’e bele asegura pasiente nia saúde,” nia relata.
Gorumali haktuir, husi fiskalizasaun ne’e, Komisaun F kontinua vizita bá iha Departamentu Onkolojia tanba tuir informasaun ne’ebé deputadu sira hetan husi médiku espesialista katak ekipamentu mak seidauk iha atubele halo tratamentu ne’ebé di’ak.
“Husi ami-nia vizita ne’e ami mós haree bá iha Departamentu Onkolojia no ami hetan informasaun husi médiku espesialista katak ekipamentu mak seidauk iha atu ajuda médiku sira halo tratamentu kle’an. Rekursu umanu ita iha médiku espesialista na’in tolu de’it atu halo tratamentu ba pasiente sira,” deputada ne’e informa.
Jornalista: Felicidade Ximenes
Editór: Xisto Freitas da Piedade
