COVALIMA, 23 janeiru 2025 (TATOLI) – Diretora Servisu Munisipál Jestaun Merkadu no Turizmu, Teresa Pires, liuhusi reuniaun Konsellu koordenasaun Munisipál aprezenta preokupasaun hodi husu servisu munisipál administrasaun Rekursu umanu atu aumenta kolokasaun funsionáriu apoiu serbisu.
“Ami menus rekursu umanu. Ida-ne’e mak problema ba ami. Tanba ne’e, ba futuru presiza aumenta funsionáriu nune’e atu apoiu serbisu iha Servisu Munisipál Jestaun Merkadu no Turizmu,” Teresa Pires, aprezenta iha salaun AMC, ohin.
Dirijente ne’e mós rekomenda ba Servisu Munisipál Administrasaun Rekursu umanu katak bainhira halo rekrutamentu no koloka funsionáriu haree ba ema nia área serbisu ne’ebé mak sira atu presta sira-nia servisu.
Ho difikuldade ne’ebé mak Jestaun merkadu enfrenta nune’e difísil atu hala’o serbisu hodi halo kontrola ba implementasaun programa sira hanesan halo jestaun ba merkadu, kontrola publisidade no identifikasaun fatin turizmu sira.
Hatan ba kestaun ne’e, Diretór Servisu Munisipál Administrasaun Rekursu Umanu, José Manuel Gonçalves klarifika, nia parte anota preokupasaun referida no sei haree kestaun ne’e bainhira atu halo kolokasaun funsionáriu sira.
“Ami husi Administrasaun Rekursu Umanu anota hela Diretora Servisu Munisipál Jestaun Merkadu no Turizmu nia preokupasaun hodi haree servisu munisipál sira ne’ebé mak transferénsia ami koko atu halo,” nia dehan.
Tuir dadus Funsionáriu Públiku ne’ebé presta servisu ba rejime jerál hamutuk 32, funsionáriu rejime espesiál 21, ajente administrasaun 44 no funsionáriu Kazuál 211 no funsionáriu ne’ebé rejistu reforma obrigatóriu hamutuk 29.
Jornalista: Celestina Teles
Editór: Rafael Ximenes de A. Belo
