2024, pasiente baixa iha HNGV hamutuk 24.130
DILI, 23 janeiru 2025 (TATOLI)—Diretora Administrasaun Finansa no Servisu Lojístika Hospital Nacional Guido Valadares (HNGV), Sara Maria Xavier, hateten husi janeiru to’o dezembru 2024, HNGV rejista pasiente sira ne’ebé baixa hamutuk 24.130.
“Ha’u hakarak informa estatístika tinan 2024 iha HNGV katak totál pasiente internadu iha HNGV durante tinan tomak hamutuk 24.130. Husi númeru ne’e, na’in 22.411 rekupera ona. Signifika katak 98% rekupera ona no fila ona bá uma ho saúde di’ak,” nia informa ba jornalista sira iha nia kna’ar fatin, HNGV, Bidau, Dili, kinta ne’e.
Sara haktuir katak hosi númeru pasiente ne’ebé baixa, maioria enfrenta moras komplikasaun hanesan ipertensaun, kankru, moras fuan, inan isin-rua, isin-manas, me’ar, asidente no sira seluk tan.
Bazeia ba dadus estatístika HNGV, nia haktuir, taxa mortalidade neto (NDR) mak 29/1000 ka pasiente ne’ebé mate liu oras 48 hamutuk 29/1000, enkuantu, pasiente ne’ebé mate menus husi oras 48 hamutuk 53/1000.
“Taxa mortalidade liu oras 48 akontese iha pasiente sira ne’ebé mai ho komplikasaun todan, inklui pasiente sira ne’ebé tama ona iha kategoria kuidadu paliativu (pasiente ne’ebé ho moras labele kura ona), hanesan kankru no moras krónika sira seluk ne’ebé labele salva sira-nia vida,” Sara esplika.
Notísia relevante: Komisaun F rekomenda pontu neen ba HNGV
Aleinde ne’e, númeru kama ne’ebé uza iha HNGV purvolta 90%, ne’e signifika pasiente internamentu hotu-hotu tenke loron neen, nune’e kama hotu-hotu pasiente utiliza hotu.
Antes ne’e, Diretór Servisu Apoiu Diagnóstiku no Terapeútiku HNGV, Vidal de Jesus Lopes rekoñese espasu iha sala emerjénsia nakonu, tanba pasiente barak demais no sira utiliza hotu fatin sira ne’ebé mak iha HNGV maibé nafatin la sufisiente.
Nia dehan, HNGV iha kama 420 to’o 450 ne’e utiliza hotu ona no mós sala emerjénsia foun ba pediatria mós nakonu, entaun sira foti alternativu seluk hodi koordena ho Servisu Saúde Munisípiu Dili hodibele apoiu tan.
Nia hatutan, HNGV mós halo ona karta ba Ministériu Saúde no hetan ona despaxu atubele utiliza ospitál António Carvalho Lahane. Fatin ospitál António Carvalho bele akumula pasiente to’o na’in 50, no agora daudaun iha ona pasiente na’in 13 mak baixa ne’ebá.
Jornalista: Felicidade Ximenes
Editór: Xisto Freitas da Piedade
