VIQUEQUE, 24 janeiru 2025 (TATOLI)—Abitante suku Ahic uma kain 450 no suku Laline uma kain 155, daudaun ne’e halerik no tuur iha nakukun laran durante fulan tolu tanba eletrisidade mate no laiha manutensaun husi tékniku EDTL, E.P Viqueque.
Xefe suku Ahic, postu administrativu Lacluta, munisípiu Viqueque, Ercilio Soares, hateten nia parte husu ona ba Eletrisidade de Timor Leste, Empreza Públika (EDTL, E.P) atu halo manutensaun, tanba eletrisidade ba suku rua ne’e avaria iha outubru 2024 nia klaran to’o ohin loron maibé seidauk hadi’a.
“Agora ahi mate tiha hanesan ne’e, ami sente hanesan tempu uluk ahi seidauk tama iha ami-nia suku. Depios, ahi avaria iha tinan kotuk, ha’u nu’udar autoridade lokál komunika kedas ba parte EDTL, E.P nasionál, to’o agora ha’u tenta beibeik hodi mai halo manutensaun maibé to’o ohin loron la halo manutensaun. Husu ba EDTL, E.P fukun loloos ne’e iha ne’ebé mak to’o ohin loron la rezolve no la preokupa komunidade suku rua ne’e nia preokupasaun,” Ercilio Soares hateten ba Agência TATOLI, iha postu Lacluta, ohin.
Nia dehan, se projetu eletrifikasuan ba suku Ahic no Laline ne’e sei iha empreza nia responsabilidade karik, EDTL, E.P nasionál nu’udar na’in ba projetu ne’e bele bolu atensaun ba empreza ne’e hodi aselera manutensaun.
“Labele husik probelama ne’e sai hanesan ne’e no povu mak sai vítima. Ohin loron, populasaun suku rua tuur nakukun laran, ita-nia estudante sira estuda mós susar tebes,” nia dehan.
Iha fatin seluk, Koordenadór EDTL, E.P, Ernesto Sarmento, klarifika eletrisidade ba suku Ahic no Laline ne’ebé avaria ne’e empreza nia kompeténsia tanba sira seidauk aprezenta relatóriu servisu final nian ba EDTL, E.P.
“Se empreza mak responsável no sira aprezenta ona relatóriu finál servisu nian ba ami karik, ne’e ami-nia kompeténsia hodi halo manutensaun. Ami kontinua halo koordenasaun ho empreza responsável sira hodi halo manutensaun ba eletrisidade ne’ebé avaria iha suku Ahic no Laline, iha tempu badak bele halo manutensaun,” nia hateten.
Projetu eletrifikasaun implementa iha suku rua ne’e implementa iha tinan 2022 no 2023 ne’ebé inaugura husi EDTL, E.P. Projetu Eletrifikasaun Nasional (PEN) ne’e, responsável husi empreza Uaitau Unipesoál, Lda no empreza Carnesia Unipesoál, Lda.
Jornalista : Vitorino Lopes da Costa
Editor : Cancio Ximenes