DILI, 24 janeiru 2025 (TATOLI)—Empreza Weststar husi Malázia fasilita elikópteru rua ba atividade petrolífera iha kampu Bayu-Undan.
Elikópteru rua ne’e ho marka 9M-WSV, iha-ne’ebé ida mai iha loron 4 janeiru 2025, enkuantu ida seluk foin to’o ohin (24/1). Elikópteru rua ne’e halo nia operasaun durante oras 80 iha fulan ida.
Empreza Weststar fasilita elikópteru rua, bazeia ba konsórsiu entre empreza Weststar ho Timor GAP iha kampu Bayu-Undan, iha-ne’ebé empreza Weststar iha asaun 55% no Timor GAP 45%.
“Ita iha parseiru ida entre Timor GAP ho Weststar atu halo atividade operasaun mina iha tasi laran. Neste momentu empreza Austrália ida mak halo hela servisu ne’e. Maibé, servisu ne’e muda fali ona bá Weststar Gap”, Prezidente Timor GAP, Rui Maria Alves Soares, hateten ba jornalista sira iha Aeroportu Internasionál Prezidente Nicolau Lobato, Komoro, sesta ne’e.
Nia dehan, elikópteru rua ne’e Governu Timor-Leste la aluga maybe ne’e Timor GAP mak konsórsiu ho asaun 45% no empreza Weststar 55%, atu fasilita transporta téknika timoroan sira ne’ebé halo atividade petrolífera iha kampu Bayu-Undan.
Rui haktuir empreza Weststar molok ne’e halo kontratu ho empreza Santos nu’udár operadór no parseiru husi dezenvolvimentu kampu Bayu-Undan, hodi lori tékniku sira ne’ebé servisu iha Bayu-Undan bá-mai.
Nia akresenta, elikópteru rua ne’e provizoriamente para iha Aeroportu Internasionál Prezidente Nicolau Lobato, maibé fulan hira bá-oin elikópteru referidu sei halo fali nia operasaun iha aeroportu Suai no kondús husi pilotu Malázia.
Iha fatin hanesan, Kapitaun Banta hosi empreza Weststar hateten sira kontente serbisu iha Timor-Leste hodi halo atividade transportasaun téknika sira ne’ebé serbisu iha Bayu-Undan.
“Ami espera servisu hamutuk ida-ne’e labele to’o de’it iha-ne’e, maibé sei kontinua tan ba tinan lima ka tinan sanulu oin mai,” nia tenik.
Notísia relevante: Empreza Weststar Aviation iha kompromisu kapasita Timór-oan sai pilotu
Jornalista: Natalino Costa
Editór: Xisto Freitas da Piedade
