iklan

DEFEZA, HEADLINE

Falur orienta Servisu Informasaun F-FDTL buka tuir ema deskoñesidu tiru karreta

Falur orienta Servisu Informasaun F-FDTL buka tuir ema deskoñesidu tiru karreta

Xefe Estadu Maiór F-FDTL, Tenente Jenerál Falur Rate Laek. Imajen Tatoli/António Daciparu

 DILI, 24 janeiru 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, fó ona orientasaun ba Servisu Informasaun F-FDTL atu buka tuir ema balun ne’ebé lori arma tiru  karreta Toyota Hilux ne’ebé para hela iha edifísiu empreza Lisun Fatuhada, Dili, sábadu (17/1/2025).

Jenerál Falur haktuir, bazeia ba informasaun ne’ebé nia simu husi Komandante Jerál PNTL, Henrique da  Costa  katak kazu kilat-musan ne’e akontese dala tolu ona. Ida mak kilat-musan ne’ebé ema deskoñesidu tiru iha rezidénsia antigu Prezidente Lú Olo iha Farol, 01 janeiru 2025 madrugada, ida seluk akontese iha Taibessi no ida seluk tan mak foin daudaun tiru karreta Toyota Hilux.

“Ita la tolera hahalok ida-ne’e,” Falur hateten ba jornalista sira hafoin serimónia entrega armamentu militár husi Ministériu Defeza ba Komandu F-FDTL ne’ebé hala’o iha Kuartél Jenerál F-FDTL, Fatuhada, Dili, sesta ne’e.

Nia apela ba militár hotu-hotu tantu sira ne’ebé ativu, sira ne’ebé la ativu, sira ne’ebé reformadu no komunidade hotu hotu tenke kontribui para bele deskobre kilat-musan ne’e sé mak tiru no mai husi ne’ebé.

Tuir Falur katak hahalok ne’e hanesan presedente aat. “Ita-nia kapasidade kontrola mártima no fronteira terrestre ita foin mak hahú, tan ne’e ema tama posível bele kaer kilat illegál no fa’an sasán proibidu sira,” nia esplika.

Nia dehan, presiza buka investiga kazu ne’e tanba iha Timor-Leste ne’e instituisaun PCIC, PNTL no F-FDTL bele kaer kilat maibé kilat-musan ne’e bele tiru bá-mai ne’e presiza investiga.

“Kuandu oknum ruma mak halo ida-ne’e, ita aplika no fó punisaun tuir lei ne’ebé iha,” nia informa.

Antes ne’e, karreta ho marka Toyota Hilux ne’ebé estasiona hela iha armazein empreza Lisun iha Fatuhada, derepente vidru rahun hanesan ema tiru, nune’e na’in ba kareta iha tersa (21/1/2025), kontatu kedas Polísia Nasionál Timor-Leste (PNTL) liuhusi Departamentu Investigasaun Kriminál Nasionál (DIK) hodi haree.

Hafoin simu denúnsia husi karreta na’in, DIK dezloka kedas ba fatin akontesimentu hodi haree karreta nia kondisaun. Bainhira polísia halo tiha identifikasaun ba karreta referida, deteta katak ema deskoñesidu mak tiru karreta ne’e no hetan kilat-musan iha fatin akontesimentu.

Hafoin konklui identifikasaun ba viatura ne’e, Departamentu Investigasaun Kriminál asegura kedas evidénsia sira lori bá DIK nia fatin iha Komandu Jerál PNTL hodi kontinua halo investigasaun.

Jornalista: Natalino Costa

Editór: Xisto Freitas da Piedade

iklan
iklan

Leave a Reply

iklan
error: Content is protected !!