ME la tolera manorin-na´in falta hanorin alunu sira sein justifikasaun
COVALIMA, 24 janeiru 2025 (TATOLI) – Sekretária Estáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos friza, Ministériu Edukasaun (ME) la tolera manorin-na´in sira falta hodi hala´o atividade ensinu-aprendizajen ba alunu sira sein justifikasaun.
“Manorin sira hanorin alunu tuir oráriu ne’ebé iha, labele falta barak. Bainhira falta, presiza iha justifikasaun tanba hanesan funsionáriu labele ko’alia atu falta tanba ne’e ministériu presiza atu haree relatóriu. Ita la tolera ba manorin falta la ho justifikasaun” Sekretária Estáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos dehan, iha Otél Vila Nova, ohin.
Governante ne’e dehan, ko’alia kona-ba disiplina manorin sira importante tanba ne’e inspetór presiza atu submete relatóriu inspesaun ba Ministériu Edukasaun (ME) nune’e atu haree situasaun ne’e desizaun saida mak atu foti bainhira atu foti desizaun ruma haree ba tipu kazu oinsá.
Ho problema ne’ebé inspetór sira identifika prosesu atu rezolve la’os iha tempu-badak, rezolve ho fazeada, maibé kona-ba disiplina manorin sira importante presiza atu submete relatóriu inspesaun ba ME nune’e atu haree problema referidu.
Iha sorin seluk, Superintendente Servisu Edukasaun Covalima Jacinto do Carmo dehan, bazeia ba rezultadu inspesaun inspetór sira identifika profesór sira la disiplina hanorin alunu sira tanba manorin sira hanorin alunu tama tarde.
“Ami konsidera profesór sira la disiplina tanba profesór sira hanorin alunu tama tarde maibé sira sai sedu no manorin sira balun hatais la’ós hanesan ema edukadór. Labele mama hodi hanorin alunu sira iha eskola,” nia akresenta.
Rezultadu aprezentasaun, manorin sira ne’ebé mak hanorin alunu la disiplina, manorin hahú husi pre-eskolár, Ensinu Báziku primeiru no terseiru siklu, ensinu sekundáriu jerál no Eskola Tékniku Vokasionál .
Tuir Rezultadu observasaun, Inpestór sira Ensinu Sekundáriu Jerál Públiku Suai no Eskola Tékniku Vokasionál hodi haree disiplina profesór sira katak profesór hamutuk 125. Husi númeru ne´e, sira ne’ebe mak disiplina hamutuk na´in 92 no profesór na’in-33 la disiplina.
Enkuantu, rezultadu observasaun Inspetór husi ensinu báziku hamutuk 801. Husi totál ne´e, na’in-664 mak tuir disiplina no na’in-137 la tuir disiplina.
Aleinde ne’e, Inpetór sira husi Pre-Eskolár ba disiplina profesór na’in-69, profesór sira ne’ebé mak disiplina hamutuk na’in-52 no profesór ne’ebé mak la disiplina hamutuk na’in-17.
Jornalista: Celestina Teles
Editór :Rafael Ximenes de A. Belo
