iklan

HEADLINE, SAÚDE

Sofre kurasaun, Longuinhos Monteiro halo tratamentu saúde iha Indonézia

Sofre kurasaun, Longuinhos Monteiro halo tratamentu saúde iha Indonézia

Diretór SNI, Longuinhos Rabindranatha Tagore Domingues de Castro Monteiro. Imajen Tatoli/Egas Cristovão

DILI, 24 janeiru 2025 (TATOLI)—Diretór Apoiu Diagnóstiku no Terapeútiku (DAT) Hospital Nacional Guido Valadares (HNGV), Vidal de Jesus Lopes, hateten eis ministru interiór no atuál diretór Servisu Nasionál Intelejénsia (SNI), Longuinhos Rabindranatha Tagore Domingues de Castro Monteiro, oras ne’e hala’o hela tratamentu saúde iha Indonézia tanba moras fuan.

“Eis ministru Longuinhos moras fuan,” Vidal informa ba TATOLI iha nia kna’ar fatin, HNGV, Bidau, Dili, sesta ne’e.

Iha sorin seluk, Prezidente Komisaun F Parlamentu Nasionál trata asuntu seguransa, sosiál  no igualdade jéneru, Maria Gorumali Barreto, hateten eis ministru Longuinhos antes ne’e baixa iha HNGV, maibé halo transferénsia bá rai-li’ur ne’e tanba hetan intervensaun husi Prezidente Repúblika (PR), José Ramos Horta, tanba moras grave.

“Ha’u atu dehan katak laiha tratamentu ida espesiál ba paisente seluk ho pasiente Longuinhos Monteiro. Ninia prosesu la’o hanesan. Nia tenke tuir hotu junta médika, maibé tanba iha intervensaunn direta husi Prezidente Repúblika, José Ramos Horta, entaun transfere nia bá rai-li’ur ho aviaun ne’ebé responsabiliza husi PR Horta rasik, la’ós mai husi Ministériu Saúde,” Maria Gorumali ba jornalista sira iha HNGV, Bidau, kinta (23/01/2025).

Nia haktuir, iha informasaun ne’ebé husi diretora ezekutivu HNGV  katak, tuir médiku espesialista kardiolojia nian halo diagnosa hatudu katak  pasiente ne’e  grave iha kurasaun, tanba  ne’e presiza halo transferénsia lalais ba rai-li’ur.

“Prosesu transferénsia ne’e PR Horta selu ho nia osan ka oinsá, ne’e PR mak bele responde. Se PR mak interven hodi responsabiliza pasiente ba rai-li’ur, ne’e bele entrevista PR mak bele responde,” nia konklui.

Jornalista: Felicidade Ximenes

Editór: Xisto Freitas da Piedade

 

iklan
iklan

Leave a Reply

iklan
error: Content is protected !!